Bıylǵy jyldyń 7 aıynda Almatyda 388 órt bolǵan - TJD

<p>ALMATY. KAZINFORM &ndash; Elimizde 2024 jylǵy 22-28 shilde aralyǵynda saýda nysandarynda órt qaýipsizdigin saqtaý boıynsha respýblıkalyq aktsııa ótti. Almaty qalasy Tótenshe jaǵdaılar departamentiniń ókilderi óńirlik kommýnıkatsııalar qyzmeti brıfınginde aktsııanyń qorytyndysyn jarııalady.</p>

Almaty TJD Memlekettik órt baqylaý basqarmasynyń bastyǵy, azamattyq qorǵaý podpolkovnıgi Konstantın Kanın saýda nsynadarynan órt shyǵýynyń basty sebebi - elektr symdarynyń qysqa tuıyqtalýy ekenin atap ótti.

«Osy jyldyń 7 aıynda Almaty qalasynyń aýmaǵynda 388 órt tirkeldi, onyń 11-i saýda nysandarynda bolǵan. Bul órtterdiń sebepteri: elektr symdary men qurylǵylarynyń qysqa tuıyqtalýy - 10 jaǵdaı, dánekerleý – 1. Nátıjesinde menshik ıelerine de, jalǵa alýshylarǵa da úlken materıaldyq zalal keltirildi. Bul tek taýarlyq-materıaldyq shyǵyn emes. Kóptegen otbasylar tabys kózinen aıyryldy», – dedi K.Kanın.

Brıfıngke qatysqan Almaty TJD Memlekettik órt baqylaý basqarmasynyń bas mamany, azamattyq qorǵaý maıory Daryn Muqanov 2024 jylǵy 22-28 shilde aralyǵynda Almaty qalasynda saýda obektilerinde órtterdiń týyndaý qaýpin azaıtý maqsatynda «Qaýipsiz saýda» respýblıkalyq aktsııasy ótkizilgenin habarlady. Onyń sheńberinde 123 saýda obektilerinde órt qaýipsizdigi salasynda profılaktıkalyq is-sharalar júrgizilgen.