Bıylǵy UBT kezinde ózgerister bola ma

<p>ASTANA. KAZINFORM &ndash; QR Ǵylym jáne joǵary bilim mınıstri Saıasat Nurbek bıyl elimizde ulttyq biryńǵaı testileý qalaı ótetinin túsindirdi.</p>

«Bıyl biz túbegeıli ózgerister jasamaımyz. Endi UBT tapsyrýdyń bes kezeńi bar. Esterińizde bolsa, buryn bári bir kúnde ótetin. Osynyń saldarynan balalar kúızeliske túsetin, úlken júkteme boldy. Bıyl testileý bes ret bolady, ıaǵnı ekeýi aqyly túrde uıymdastyrylady. Qańtar aıyndaǵy testileýge 130 myńǵa jýyq adam qatysty. Endi naýryz aıyndaǵy testileý bar. Eki aqyly testileý kezinde bala óz kúshin synap kóredi, óziniń álsiz jaqtaryn túsinýge múmkindigi bar. Eki negizgi test mamyrdan shildege deıin sozylady jáne bala tirkelgen osy eki kezeńniń ishinde eń joǵary ball arqyly grantqa úmitker bola alady. Tamyz aıynda besinshi kezeń de bar. Bul aqyly oqýǵa túsetin nemese tapsyrýǵa úlgermegenderge, sondaı-aq halyqaralyq ýnıversıtetterdiń nátıjesin kútip júrgenderge arnalǵan. Jalpy, keıingi kezde UBT-ǵa qatysty keleńsiz jaǵdaılar, sýıtsıdter kezdesip jatqan joq», - dedi S. Nurbek Parlament Májilisinde tilshiler suraǵyna jaýap bere otyryp.

Bul rette mınıstr bıylǵy UBT-da qandaı naqty ózgerister bolatynyn aıtty.

«Osy jyly túbegeıli eshteńeni ózgertpeımiz, biraq upaılar azdap qaıta bólindi, endi biz negizgi júktemeni negizgi mamandyq pánderine berip jatyrmyz. Endi talapker beıindik pánder boıynsha joǵary ball alady», — dep túsindirdi Saıasat Nurbek.

Aıta keteıik, naýryz aıynda ótetin UBT-ǵa qatysý úshin ótinish qabyldaý 27 aqpanda bastalyp, 10 naýryzǵa deıin jalǵasady.  

Qańtar aıynda 134 myńǵa jýyq talapker UBT tapsyrdy.