Bıylǵy bıýdjetten ońtaılandyrylǵan qarajat tek ekonomıkalyq ósimdi yntalandyrýǵa baǵyttalady – Premer-Mınıstr
«Únemdelgen qarajatty ońdy-soldy shashpaı, tek ekonomıkalyq ósimdi yntalandyrýǵa baǵyttaımyz. Bul jumysty jalǵastyrý qajet. 2025-2027 jyldarǵa arnalǵan respýblıkalyq bıýdjet josparyn qalyptastyrý kezinde osy jumystyń nátıjelerin eskergen jón. Ekonomıkany yryqtandyrý jónindegi tásilderdi jalpy biz talqyladyq. Biz ony qoldaımyz. Memlekettik qoldaý teńgerimdi bolyp, naryqtyń tıimdi jumysyn qamtamasyz etýge jáne barlyq qatysýshylardyń múddelerin qoldaýǵa baǵyttalýy tıis. Kásipkerlik sýbektiler erkin básekege túsetin básekelestik qurý qajet. Sonymen qatar ulttyq múddeler men qaýipsizdikti eskerý mańyzdy», - dedi Úkimet basshysy.
Premer-Mınıstr Ekonomıkany yryqtandyrý jónindegi Jarlyqty iske asyrý boıynsha jospardy ázirleý kezinde otyn-energetıka kesheni, kólik, baılanys jáne ózge de taýar naryqtaryndaǵy básekelestikti damytý sharalaryna erekshe nazar aýdarý qajettigin aıtty.
«Sondaı-aq josparda halyqaralyq prıntsıpterdi saqtaı otyryp, korporatıvtik basqarýdy jetildirý jónindegi júıeli sharalar qamtylýy tıis. Jumyskerlerge eńbekaqy tóleý qorynan biryńǵaı tólemge qatysty ádisnamalyq jáne tehnıkalyq máseleler bar. Osyǵan baılanysty Qarjy mınıstrligi Tsıfrlandyrý, Eńbek, Densaýlyq saqtaý, Ulttyq ekonomıka mınıstrlikterimen birge biryńǵaı tólemdi qoldaný krıterıılerin qaıta qarap, esepteý jáne tóleý mehanızmin ońaılatý, qoldaný aıasyn keńeıtý qajet», - dedi Oljas Bektenov.