Bıyl jınalatyn astyqtyń kólemi ishki naryqty unmen qamtamasyz etýge jete me

<p>Búgin Májilistiń jalpy otyrysynda Premer-Mınıstrdiń orynbasary Tamara Dúısenova azyq-túlik qaýipsizdigine qatysty túsinik berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Eldiń birqatar astyqty óńirlerindegi aýa raıynyń qolaısyz jaǵdaıyna baılanysty qazir bul másele ózekti bolyp tur. Memleket basshysynyń tapsyrmasyna sáıkes taýar óndirýshilerdi qoldaý maqsatynda tıisti sharalar qabyldandy. Astyqty keptirý úshin 62,5 myń tonna arzan baǵada dızel otyny bólindi. Sonymen qatar, qarjy ınstıtýttary aıyppul sanktsııalaryn qoldanbaı, nesıeler men qaryzdardyń merzimin uzartýdy júzege asyrmaq», - dedi T. Dúısenova.

Onyń aıtýynsha, «Azyq-túlik kelisimshart korporatsııasynyń» qorlary negizinde tuqym qory qalyptasady.

«Agroóndiris keshenin sýbsıdııalaýǵa qosymsha qarjy bólý máselesi pysyqtalyp jatyr. Bul shara aýylsharýashylyq óndirýshilerin qoldaý maqsatynda astyqty tikeleı satyp alýdy da kózdeıdi. Óńirlik deńgeıde tótenshe jaǵdaı rejımi jarııalanǵan Jambyl oblysynyń sharýalaryna ótemaqy tóleý úshin tıisti jumys atqarylyp otyr. Bul maqsatqa 3,7 mlrd teńge bólindi. Budan basqa, ishki naryqta bıdaı baǵasyn turaqtandyrý jáne «paralleldi ımport» ákelýdi boldyrmaý maqsatynda 2024 jyldyń 11 sáýirine deıin Eýrazııalyq ekonomıkalyq odaqqa múshe jáne basqa da úshinshi elderden Qazaqstan aýmaǵyna temirjol kóligimen bıdaı ákelýge tyıym salý merzimi uzartyldy», - dedi Úkimet basshysynyń orynbasary.

Onyń sózine qaraǵanda, bıyl jınalatyn astyqtyń kólemi elimizdi nanmen jáne unmen tolyq qamtamasyz etý úshin jetkilikti bolady.