Bıyl jetim jáne ata-anasynyń qamqorlyǵynsyz qalǵan 1 599 bala baspanaly boldy
— «Turǵyn úı qatynastary týraly» Zańǵa sáıkes, jetim balalar men ata-anasynyń qamqorlyǵynsyz qalǵan balalarǵa kommýnaldyq turǵyn úı qorynan nemese jeke turǵyn úı qorynan jergilikti atqarýshy organ jaldaǵan turǵyn úılerdiń jalpy sanynyń keminde 20 paıyzy bólinedi. Jetim balalarǵa jáne AQQ balalarǵa jylyna beriletin turǵyn úı sany 2 esege (2020 jyly 847 páterden 2024 jyldyń 9 aıynda 1 599 páterge deıin.) artty. Jergilikti atqarýshy organdardyń aqparaty boıynsha 2015 jyldan bastap jalǵa beriletin turǵyn úımen 83 373 adam qamtamasyz etildi, onyń ishinde jetim balalar men ata-anasynyń qamqorlyǵynsyz qalǵan balalar — 10 529. 2024 jyldyń 9 aıynyń qorytyndysy boıynsha 8 113 jaldamaly páter, onyń 1 599 birligi jetim balalar men AQQ balalarǵa berildi, — dedi Úkimet basshysy jaýabynda.
Onyń atap ótýinshe, Turǵyn úı-kommýnaldyq ınfraqurylymdy damytýdyń 2026 jylǵa deıingi tujyrymdamasy aıasynda turǵyn úıge muqtajdar esebinde turǵan azamattar, onyń ishinde jetim balalar men ata-anasynyń qamqorlyǵynsyz qalǵan balalar úshin «2-10-20» jáne «5-10-20» jeńildikti ıpotekalyq baǵdarlamalary kózdelgen.
— Sondaı-aq 2022 jyly Memleket basshysynyń tapsyrmasy boıynsha jeke turǵyn úı qorynan jalǵa alynǵan turǵyn úı úshin jaldaý aqysynyń bir bóligin (50/50) sýbsıdııalaý tetigi iske qosyldy. Baǵdarlamany sońǵy 6 aıdaǵy tabysy 1 kúnkóris deńgeıinen tómen, muqtajdar esebinde turǵan jetim balalar men ata-anasynyń qamqorlyǵynsyz qalǵan balalar paıdalanýyna bolady, — dedi Premer-Mınıstr.