Bıyl jańa astyqty keptirýge sharýalarǵa alǵash ret suıytylǵan gaz bólindi

<p>PETROPAVL. KAZINFORM — Soltústik Qazaqstan oblysynda egin oraǵy bastalǵaly dıqandar bar alqaptyń tek 18% ǵana jınap úlgerdi. Nátıjesinde bir mln tonnaǵa jýyq bıdaı bastyryldy.</p>

SQO aýyl sharýashylyǵy jáne jer qatynastary basqarmasynyń basshysy Meıram Meńdibaevtyń aıtýynsha, bıyl ár gektardan 17,3 tsentnerden ónim alynyp jatyr.

Byltyr ónimdilik — 12 ts/ga boldy. Biraq egin oraǵy óte baıaý júrip jatyr. Oǵan sebep — aýa raıy.

«Qyrkúıek aıy bastalǵaly jaýyn-shashynnyń aılyq ortasha kórsetkishiniń 57% jaýdy. Sınoptıkterdiń boljamynsha alda kún ashyq bolady. Sondyqtan dıqandar muny barynsha paıdalanady. Byltyr osy ýaqytta bir mln ga jýyq alqaptyń astyǵy jınalǵan edi. Bıyl sonyń jartysy ǵana oryldy», — deıdi Meıram Meńdibaev. 

Óńir elevatorlaryna 180 myń tonna dándi daqyl tústi. Jetkizilgen bıdaıdyń jartysy 3 klasqa jatady. 

«Astyq qabyldaý oryndaryna bıdaı joǵary ylǵalmen túsip jatyr. Keptirý úshin qosymsha shyǵyn ketedi. Sondyqtan bıyl Úkimet alǵash ret dıqandarǵa arzan baǵamen suıytylǵan gazdy bóldi. SQO-ǵa myń tonna berildi. Óıtkeni óńirdegi 59 astyq qabyldaý orny gazben jumys isteıdi. Budan bólek osy maqsatqa 20 myń tonna arzandatylǵan dızel otyny berildi, qazir ótinishter qabyldanyp jatyr», — deıdi Meıram Meńdibaev. 

SQO-da búginde 46 elevator jáne 332 astyq qabyldaý orny bar. Olar 7 mln tonnaǵa jýyq dándi daqyldy keptire alady. 

Esterińizge salaıyq, bıyl SQO 4,4 mln ga dándi-maıly daqyldardy ekti. Qazir alqapta 7 myń tehnıka egin oryp jatyr.