Bıyl zańsyz aınalymnan 19 tonnadan astam ártúrli esirtki zattary alyndy
«Osy jyldyń basynan ishki ister organdary esirtkige qatysty 6 279 quqyq buzýshylyqty anyqtady. Zańsyz aınalymnan 19 tonna 261 keli (2023 jyly – 31 tonna 925 keli) ártúrli esirtki, onyń ishinde 1 keli 601 gramm (62 keli) geroın, 4 tonna 787 keli (5 tonna 314 keli) marıhýana, 515 keli (418 keli) gashısh, 431,4 keli (241 keli) sıntetıkalyq esirtki alyndy. 48 esirtki zerthanasynyń qyzmeti joıyldy. Onyń ishinde: sıntetıkalyq preparattardy óndiretin 30 zerthana men 18 fıtozerthana bar. 226 keli tutynýǵa daıyn sıntetıkalyq preparat, 2 tonna 487 keli prekýrsor, 72,1 keli kannabıs tuqymdas esirtki alyndy», - dep atap ótedi mınıstr.
Onyń aıtýynsha, praktıkalyq jumystarmen qatar ártúrli quqyqtyq tetikter de jetildirilip jatyr. Qylmystyń qaýipti túrlerine esirtkini tutynýǵa ıtermeleý jáne Internet arqyly satý jatady. Olardy jasaǵany úshin 3 jyldan 15 jylǵa deıin, al keıbir jaǵdaılarda ómir boıy bas bostandyǵynan aıyrý jazasy qarastyrylǵan. Esirtkilerdi nasıhattaǵany jáne zańsyz jarnamalaǵany úshin 3 jyldan 6 jylǵa deıin jazalaýmen qylmystyq jaýapkershilik engizildi.
«Bıyl 2,9 myńnan astam esirtki saıty buǵattaldy. Internet arqyly esirtki satýdyń 503 faktisi anyqtaldy. Bul rette «qatardaǵy jasyrýshylar» (292 adam) ǵana emes, esirtki bıznesiniń uıymdastyrýshylary da áshkerelenedi. Bul - ákimshiler, operatorlar, «salýshylar» jáne «býyp-túıýshiler». Osyndaı 65 adam ustaldy. «Telegram» ókilderimen ózara is-qımyl ornatyldy. Nátıjesinde 1,5 myńnan astam quqyqqa qaıshy kontent obekti, onyń ishinde 30 «ınternet-dúkeniniń» 670 rezervtik shynyly alańdary joıyldy. Esirtkini jarnamalaý jáne nasıhattaý faktileri boıynsha 191 (51) sotqa deıingi óndiris qozǵaldy. OLX saıtymen memorandým jasaldy. Endi onyń qyzmetkerleri kúdikti jarnamalardy ózderi anyqtap, buǵattaıdy», - dedi Erjan Sádenov.
Buǵan deıin esirtki qylmysyn jasaǵany úshin 4 293 adam jazasyn túrmede ótep jatqanyn jazǵan edik.