Bıyl suıytylǵan gaz baǵasyn ózgertý josparlanyp otyr

<p>ASTANA. KAZINFORM &ndash; QR Energetıka mınıstri Almasadam Sátqalıev eldegi suıytylǵan munaı gazy jyl saıyn josparly túrde qymbattaıtynyn aıtty.</p>

Mınıstrlik alqasynyń otyrysynda tilshiler suıytylǵan gaz baǵasy qashan jáne qanshaǵa qymbattaıtynyn surady. 

«Mundaǵy áńgime josparly jumys jóninde bolyp otyr. Biz suıytylǵan munaı gazynyń baǵasyn jyl saıyn arttyrýdy josparlap otyrmyz. Al bıyl biz óńirlerge qaraı shamamen 5-8 teńgeden azdap qosýdy josparlap otyrmyz. Bıylǵy kóktemde mınıstrliktiń josparynda osyndaı qymbattatý bar», - dep jaýap berdi A. Sátqalıev. 

Buǵan deıin vedomstvo basshysy eldegi suıytylǵan munaı gazy baǵasy óte tómen ekenin málim etken edi. 

«Búgingi kúni suıytylǵan munaı gazyna belgilengen shekti kóterme saýda baǵasy ony óndirý qunynan tómen. Gaz óndirisiniń tıimsizdigine baılanysty sala shyǵynǵa ushyraýda, turaqty jóndeý jumystary júrgizilmeıdi jáne jańǵyrtýǵa qarajat salynbaıdy», - dedi ol. 

Qazir óńirlerge qaraı eldegi suıytylǵan gaz baǵasy 54-86 teńge aralyǵynda. Salystyrý úshin Reseıde bir lıtr gazdyń baǵasy 165 teńgeni, Qyrǵyzstanda – 159 teńgeni, Ázerbaıjanda – 171 teńgeni, Tájikstanda – 273 teńgeni quraıdy.