Bıyl sport salasynda 39 jemqorlyq áreketi tirkeldi – antıkor
Sybaılas jemqorlyqqa qarsy is-qımyl agenttigi baspasóz qyzmetiniń habarlaýynsha, májiliste elimizde sportty damytýǵa bólinetin memlekettik qarajattyń utymsyz jáne tıimsiz jumsalýyna ákep soqtyratyn eleýli jemqorlyq táýekelderi men faktorlarynyń bolýyn kórsetken syrtqy taldaý nátıjeleri talqylandy.
Beıindi mınıstrlik ishindegi jemqorlyqtyń aýqymy qazirgi ýaqytta burynǵy vıtse-mınıstr, Sport jáne dene shynyqtyrý isteri komıtetiniń tóraǵasy, Sportty damytý dırektsııasynyń basshysy jáne basqa da laýazymdy tulǵalardyń qylmystyq jaýapqa tartylýyna ákeldi.
Ult densaýlyǵyn nyǵaıtý jáne buqaralyq, ásirese balalar sportyn damytý máselelerine memleket basshysy erekshe kóńil bóledi.
Tek sońǵy 6 jylda osy saladaǵy bıýdjet 2 esege ósip, 1,4 trln teńgeni qurady.
Alaıda, Qazaqstannyń álemdik sporttaǵy reıtıngi tómendep barady.
Osy sala bıýdjetiniń 90%-y jumsalatyn «joǵary jetistikter» jáne «buqaralyq» sportty qarjylandyrý arasynda teńgerimsizdik baıqalady.
Al damyǵan elderde proportsııalar múldem ózgeshe jáne buqaralyq sportqa qarajat bólý basym.
«Qarjylandyrýdaǵy dısproportsııa jemqorlyq shemalaryna negiz boldy. Eger buqaralyq sportta qazir tsıfrlandyrylǵan jan basyna shaqqandaǵy qarjylandyrý baǵdarlamasy jumys istep tursa, onda joǵary jetistikter sportynda ashyq emes jáne sýbektıvti tólemder, az baqylaý, affılırlengen qatysýshylar, jalǵan oqý-jattyǵýlar jáne qosarlanǵan qarjylandyrýǵa jaǵdaı jasalǵan», – dep atap ótti agenttik tóraǵasy.
Sporttyq protsesterde tsıfrlandyrýdyń bolmaýy jemqorlyq quqyq buzýshylyqtar men qarajattardyń jymqyrylýyna qolaıly.
Eki jyl buryn josparlanǵan «E-sport» aqparattyq júıesi osy ýaqytqa deıin iske qosylǵan joq. «Sport sheberleri» jalǵan ataqtaryn berý faktileri anyqtaldy.
Májiliste Qazaqstandaǵy sportshylardy natýralızatsııalaý, kásibı klýbtardyń bıýdjetterin qalyptastyrý jáne legıonerlerge tólemderdi qarjylandyrý máseleleri talqylandy.
El Prezıdentiniń bıýdjet pen jalaqy mólsherin shekteý jónindegi tapsyrmasyna qaramastan, elimizdiń fýtbol kásipodaq klýbtary sońǵy 3 jyl ishinde 30 mlrd teńgeden astam ústeme aqy tóledi.
Sonymen qatar, óziniń sporttyq ınfraqurylymyn damytýdyń ornyna bıýdjet qarajaty legıonerlerge tólem jasaýǵa jáne sport nysandaryn jalǵa alýǵa jumsaldy.
Taldaý qorytyndysy boıynsha Agenttik salalyq mınıstrliktiń atyna jemqorlyq táýekelderin joıý boıynsha usynymdar engizdi.
Vedomstvolyq baqylaýdy kúsheıtý jáne dıskretsııalyq ókilettikterdi qysqartý, qarajatty bólý protsesterin naqty normatıvtik jáne quqyqtyq reglamentteýdi belgileý jáne buzýshylyqtar úshin jaýapkershilikti derbestendirý, sondaı-aq biryńǵaı tsıfrlyq platforma qurý týraly suraqtar qoıyldy.
Óz sózinde Týrızm jáne sport mınıstri E.B. Marjyqpaev memlekettik organnyń qazirgi ýaqytta uıymdyq-quqyqtyq sharalar keshenin qabyldaǵany týraly habardar etip, jemqorlyq táýekelderin joıý boıynsha barlyq usynymdardyń mindetti túrde oryndalatyndyǵyn aıtty.
Ulttyq olımpıada komıtetiniń prezıdenti G.G. Golovkın: «Meniń ustanymym birjaqty jáne meniń sporttyq mansabym da ózgerissiz qalady – jemqorlyqqa múldem tózbeýshilikti qalyptastyryp, onyń kez kelgen kórinisterine qatań sharalar qoldaný qajet», - dep atap ótti.
Keńes qorytyndysy boıynsha Sybaılas jemqorlyqqa qarsy vedomstvonyń basshysy ýákiletti organdardy eldegi sportty damytý jónindegi tikeleı mindetterdi múltiksiz oryndaýǵa shaqyrdy jáne jemqorlyq buzýshylyqtardyń jasalýyna jol bermeý týraly eskertti.
Sóz sońynda A.Jumaǵalı qazaqstandyq sportshylarǵa aldaǵy olımpıadada tabys tiledi.
Májilis jumysyna Agenttik tóraǵasy A. Jumaǵalımen birge Týrızm jáne sport mınıstri E.B. Marjyqpaev, Ulttyq olımpıada komıtetiniń prezıdenti G.G. Golovkın, Astana qalasynyń ákimi J.M. Qasymbek, qarjy jáne tsıfrlandyrý vıtse-mınıstrleri, «Samuryq-Qazyna» AQ basshylyǵy, qoǵam qaıratkerleri, ortalyq jáne óńirlik memlekettik organdar qatysty.