Bıyl shegirtkege qarsy kúreske jappaı dron qoldanylady

<p>ASTANA. KAZINFORM — Memleket shegirtke dernásilderin baqylaý úshin fıtosanıtarlyq qyzmetke kómekke arnaıy drondar satyp alady. Sondaı-aq egistikti óńdeýge arnalǵan drondardy satyp alýdy sýbsıdııalaý múmkindigi qarastyrylady.</p>

Astanada 23 mamyr kúni vıtse-premer Serik Jumanǵarın shegirtkege qarsy kúres jónindegi jedel shtabtyń ekinshi otyrysyn ótkizdi.

Qazirgi ýaqytta barlyq óńirlerde oblys ákimderi orynbasarlarynyń basshylyǵymen jedel jumys úshin jergilikti deńgeıdegi shtabtar quryldy.

Boljamdar ózgergen joq, óńdeýge bekitilgen aýmaq 2,5 mln ga kóleminde qalyp otyr.

Eń úlken aýmaq — Aqtóbe (784,4 myń ga) jáne Qostanaı (775,6 myń ga) oblystarynda. 

Foto: QR Úkimeti

Bul aýmaqty shegirtkeniń ıtalıalyq prýs túrinen tazartý qajet.

Shyǵys, soltústik jáne ortalyq aımaqtardaǵy sýyq aýa raıyna baılanysty shegirtke dernásilderiniń jappaı kóbeıýi men damýy kesheýildep tur.

Óńdeý jumystary Aqtóbe (10,8 myń ga), Almaty (0,2 myń ga), Atyraý (0,8 myń ga), Jambyl (5,1 myń ga), Jetisý (0,7 myń ga), Batys Qazaqstan (0,6 myń ga) oblystarynda bastaldy.

Túrkistan jáne Jambyl oblystarynda taralǵan marokko shegirtkesine qarsy óńdeý jumystary aıaqtaldy.

Túrkistanda tazartý 255,3 myń ga-ǵa nemese 94%-ǵa júrgizildi, Jambylda — 9,7 myń ga nemese 99,5% jer óńdeldi.

Shegirtkelerdiń taralýynyń úlken aýqymyn, qol jetpeıtin jerlerde jumys isteýdiń kúrdeliligin jáne dernásilderdiń naqty ornalasqan jerin bilýdiń mańyzyn eskere otyryp, Aýyl sharýashylyǵy mınıstrligi shegirtkelerdi baqylaý jáne naqty fıtosanıtarlyq kartalardy jasaý úshin AÓK-degi Memlekettik ınspektsııa komıtetiniń aýmaqtyq ınspektsııalaryna dron satyp alady.

«Drondar shegirtkege qarsy kúreste tıimdiligin kórsetedi. Dernásilderdiń belsendi ósý merziminiń qysqa kezeńinde mundaı aýmaqtardy dástúrli túrde — jaıaý nemese mashınalarmen óńdep shyǵý óte qıyn. Tolyq óńdelmeı qalý yqtımaldyǵy joǵary. Aýyl sharýashylyǵy, ónerkásip jáne qurylys mınıstrlikteri egistikterdi zııankesterden óńdeý úshin drondardy ınvestıtsııalyq sýbsıdııalaý máselesin pysyqtaýy qajet», — dep qorytyndylady jedel shtab otyrysyn Serik Jumanǵarın.