Bıyl sharýalarǵa 11 mlrd tekshe metr sý berildi – mınıstrlik

<p>ASTANA. KAZINFORM &ndash; Bıyl elimizdegi sý qoımalaryna barynsha kóp kólemde sý jiberildi. Bul týraly QR Sý resýrstary jáne ırrıgatsııa mınıstrliginiń resmı ókili Móldir Ábdýalıeva aıtty.&nbsp;&nbsp;</p>

«Elimizde 1 sáýirde bastalyp, qyrkúıektiń sońyna deıin jalǵasatyn sýarý maýsymy aıaqtalýǵa jaqyn. Qurǵaqshylyq týraly kóptegen boljamǵa qaramastan, Sý resýrstary jáne ırrıgatsııa mınıstrligi tótenshe jaǵdaıdyń, sýarmaly sý tapshylyǵynyń aldyn alyp, byltyrǵy jaǵdaıdan keıin jınaǵan tájirıbeniń nátıjesinde sharýalardy sýmen úzdiksiz qamtamasyz etkenin atap ótkim keledi. Sýarý maýsymynda sharýalarǵa shamamen 11 mlrd tekshe metr sý berildi. Mınıstrliktiń vedomstvolyq baǵynysty uıymy – «Qazsýshar» fılıaldary sharýa qojalyqtarymen sýarmaly sý berý jóninde 25 myńǵa jýyq kelisimshart bekitti», - dedi M. Ábdýalıeva Ortalyq kommýnıkatsııalar qyzmetindegi baspasóz máslıhatynda.

Osy oraıda ol sý tutyný kórsetkishi joǵary aımaqtarǵa toqtaldy. Qyzylorda oblysyna – 3,5 mlrd tekshe metr, Túrkistan oblysyna – 3,2 mlrd tekshe metrden artyq, Jetisý oblysyna – 1,2 mlrd jáne Jambyl oblysyna 1 mlrd tekshe metrden astam sý berildi.

Onyń aıtýynsha, jumys negizgi 3 baǵyt boıynsha júrgizildi. Birinshiden, sý tasqyny kezinde sý qoımalaryn toltyrý maqsaty qoıyldy. Keıingi birneshe jylda alǵash ret, tipti keıbir nysandardy paıdalaný tarıhynda birinshi ret sý qoımalary 100%-ǵa toltyryldy. Ekinshiden, sý dıplomatııasyna erekshe ekipin qoıyldy. Bul turǵyda geografııalyq ornalasýymyzǵa baılanysty elimizdiń ońtústik aımaqtaryn sýmen qamtamasyz etýde kórshi eldermen kelissózder men kelisimder jalǵasty. Úshinshiden, gıdroqurylystar daıyndaldy, ıaǵnı jóndeý jumystary, rekonstrýktsııalaý, kanaldardy tazartý, ırrıgatsııalyq jelilerdi daıyndaý jáne basqa da jumystar uıymdastyryldy.