Bıyl Pavlodar oblysynda 1,4 mln tonnadan astam mal azyǵy daıyndalady

<p>PAVLODAR. KAZINFORM — Ertis-Baıan óńirinde shabyndyqqa shalǵy túsip, aýyl jur­ty tórt túliktiń qysqy jemshó­bin qamdaýdyń qamyna kiristi. Bıyl óńir boıynsha 1,4 mln tonnadan astam shóp daıyndaý josparlanyp otyr. </p>

Óńirlik aýyl sharýashylyǵy basqarmasynyń bas mamany Zámzagúl Búrkitbaevanyń aqparynsha, bıyl oblysta jalpy aýmaǵy 1 mln 575 myń gektar jerge shalǵy túsedi.

Onyń ishinde kópjyldyq shópter — 233,3 myń, jaıylmalar men kóltabandar — 208,7 myń, birjyldyq shópter — 58 myń, shabylýǵa jatatyn jaıylym 1 mln 75 myń gektardaı bolyp qalady.

— Sońǵy aqparat boıynsha óńirdegi qystaqtarǵa 1 mln 404,4 myń tonna mal azyǵy qajet. Mal ıelerine shamamen bir jarym jyldyq azyq qoryn daıyndaýdy (1 mln 823 myń tonna) usynyp otyrmyz. Shabyndyqtardaǵy shóptiń shyǵymy jyldaǵydan aıtarlyqtaı joǵary, fermerlerdiń málimetterine súıensek ortasha eseppen ár gektardan 8,9 tsentnerden aınalýda. Al kópjyldyq shópterdiń ónimdiligi gektaryna — 9 tsentner, jaıylmalar men kóltabandarda — 18,9 tsentnerge deıin jetip tur. Buǵan qosa 86,5 myń tonna pishendeme men 182 myń tonna súrlem, 208 myń tonna saban daıyndaý josparda bar, -deıdi basqarma ókili.

Qazirgi ýaqytta shabyndyqtardyń 81,6 myń gektary shabylyp úlgergen. Sharýalar odan 64,2 myń tonna mal azyǵyn shaýyp, 1,2 myń tonna súrlem daıyndaǵan.

Bıyl Maı aýdany jurtynyń kóńili de jaı. Jergilikti halyqtyń aıtýynsha, jaıylmalar turmaq, qyrdaǵy jerdiń shóbi de qalyń shyǵyp, at baýyrynan keledi.

Aýdandaǵy 125 myńdaı túliktiń (qara mal men qoı-eshki) qysqy azyǵyna shamamen 140 myń tonnadaı shóp qajet.

Bul shamadaǵy azyqty mal ıeleri qınalmaı shaýyp alamyz dep otyr.

— Jaıylmanyń kóp bóligi áli kúnge kepken joq, soǵan oraı azamattar shalǵy túsire qoımaǵan. Al qyrdyń shóbine eldiń aldy kirisip ketti. Byltyr qýańshylyq kezinde mal ósirýshiler qolǵa ilikken jerdiń barlyǵyn shaýyp aldy. Sonyń da nátıjesi bolsa kerek, shabyndyqtar tyńaıǵan. Gektarynan 8-9 tsentner shóp alyp jatyr. Mynaý Aqshıman jaqtyń halqy mal azyǵyn jınaýda jylda qınalyp qalatyn. Bıyl bul jaqta da jaǵdaı táýir. Óńirimizde 312 sharýashylyq bar, olardyń barlyǵy mal azyǵy boıynsha qor molynan bolady degen boljam jasap otyr. Fermerlerge shamalary jetse eki jyldyq qor jasap alyńyzdar degen aqyl-keńes berdik, -deıdi Maı aýdanynyń ákimi Aǵybaı Ámirın.

Al oblys ákimdigindegiler Ertis ózeni jaıylmasyndaǵy shabyndyqtardyń 35 paıyzy qurǵap úlgergenin aıtady.

Ózen boıyn jaılaǵan eldi mekender búginde birtindep maldyń qysqy azyǵyn jınaýǵa kirise bastaǵan.

Bıyl Sharbaqty aýdanynyń birneshe sharýa qojalyǵy aýyldar mańyndaǵy shabyndyqtar men jaıylymdardy jańartý maqsatynda 600 gektar jerge erkekshóp egipti. 

Eger bul joba nátıjeli bolsa, ony ózge aýdandarda taratý jospary bar.

Eske sala keteıik, bıyl oblystaǵy egis tanaptarynyń aýmaǵy 1,6 mln gektardan asty.