Bıyl Otan qorǵaýshy kúnin erekshe jaǵdaıda atap ótip otyrmyz — mınıstr
«Otan qorǵaýshy kúni erlik pen dańqtyń, Otanǵa janqııarlyqpen qyzmet etýdiń sımvolyna aınaldy. Sizder elimizdiń memlekettik qoldaýdyń arqasynda búginde Qarýly kúshterdiń qazirgi zamanǵy, jaýyngerlik qabileti joǵary ári qýatty armııa retinde qalyptasqanyna kýá bolyp otyrsyzdar. Biz jańa ádisterdi qoldana otyryp, ondaǵan komandalyq-shtabtyq oqý-jattyǵýlar ótkizdik. Qazaqstandyq jaýyngerler shetelde ótken túrli oqý-jattyǵýlar men jarystarǵa qatysty. El aýmaǵynda da birlesken is-sharalar ótkizildi. Bitimgerlik qyzmette sapaly qadam jasaldy. Men shetelderdegi birqatar halyqaralyq mıssııalarǵa qatysqan qazaqstandyq áskerı qyzmetshilerge rızashylyǵymdy bildiremin. Jaýyngerlik kezekshiliktegi, sondaı-aq elimizdiń áýe keńistigi kúzetindegi jaýyngerlerge de alǵysym sheksiz» deıdi mınıstr.
Onyń aıtýynsha, ásirese tabıǵı apattardyń zardabyn joıýda belsendi qyzmet atqarylǵan.
Áskerı qyzmetshilerdiń azamattardyń qaýipsizdigin saqtaýǵa qosqan úlesi orasan zor.
«Bıyl biz Otan qorǵaýshylar kúnin erekshe jaǵdaıda atap ótemiz. Bizdiń áskerı qyzmetshiler tasqyn sýǵa qarsy kúreste qajetti sharalardy qamtamasyz ete otyryp, óz mindetterin abyroımen oryndap shyqty. Osy qarbalas kezeńde jaýyngerlerimizdiń joǵary kásipqoılyǵy, boryshqa adaldyǵy, dostyq pen ózara kómek sııaqty qasıetteri aıqyn kórindi. Qarapaıym adamdar úshin bul ońaı synaq bolǵan joq. Al áskerı adamdar úshin bul kezekti jattyǵý boldy. Men qorǵanys vedomstvosynyń basshysy retinde osy qıyn-qystaý kezeńdegi armııa men halyqtyń birtutastyǵyn maqtanyshpen aıta alamyn. El Prezıdenti — Qazaqstan Respýblıkasy Qarýly kúshteriniń Joǵarǵy Bas qolbasshysy Qasym-Jomart Toqaev: „Qarýly kúshter bir maqsatqa — azamattarymyzdy, Konstıtýtsııalyq qurylysymyzdy jáne egemendigimizdi kez kelgen sıpattaǵy jáne aýqymdaǵy qaterlerden barynsha tıimdi qorǵaý úshin úılesimdi jumys isteýi tıis“ dedi. Aldaǵy ýaqytta da bizdiń tózimdiligimiz synalatyn sátter az emes. Biz onyń bárine abyroımen tótep beretinimizge jáne kez kelgen qaýip-qaterge qarsy turýǵa árqashan daıyn bolatynymyzǵa senimdimin. Jeke óz atymnan jáne Qorǵanys mınıstrliginiń jeke quramy atynan Otan qorǵaýshylar kúnine oraı shyn júrekten shyqqan quttyqtaýymdy qabyl alyńyzdar! Áskerı qyzmetshilerge, azamattyq personalǵa, Qarýly kúshterdiń ardagerlerine jáne el azamattaryna zor densaýlyq, amandyq, kóterińki kóńil-kúı jáne týǵan Otanymyz — Qazaqstan Respýblıkasynyń órkendeýi jolyndaǵy mindetterdi iske asyrýda jetistik tileımin!» deıdi Rýslan Jaqsylyqov.
Eske sala keteıik, búgin Qazaqstanda Otan qorǵaýshy kúni toılanyp jatyr.