Bıyl ormandy zańsyz kesýdiń 214 faktisi tirkeldi – mınıstr

<p>Bıyl elimizde ormandy zańsyz kesýdiń 214 faktisi tirkeldi. Bul týraly Ekologııa jáne tabıǵı resýrstar mınıstri Erlan Nysanbaev aıtty, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

«Bıyl ormandy qorǵaý jónindegi is-sharalar aıasynda memlekettik orman qory aýmaǵynda 16 myńnan astam reıd júrgizildi. 6 myń tekshe metr kóleminde ormandy zańsyz kesýdiń 214 faktisi anyqtaldy. Keltirilgen zalal somasy 425 mln teńgeni qurady. Bul faktiler boıynsha 61 buzýshyǵa 207,5 mln teńge somasynda talap-aryz usynyldy. 17 kólik quraly men 40 aǵash kesý quraly tárkilendi», - dedi mınıstr Ortalyq kommýnıkatsııalar qyzmetindegi baspasóz máslıhatynda.

Vedomstvo basshysynyń atap ótýinshe, Prezıdenttiń eldi mekenderge 15 mln kóshet otyrǵyzý tapsyrmasy boıynsha naqty jumystar júrgizilip jatyr.

«Oblystardyń, Astana, Almaty jáne Shymkent qalalarynyń eldi mekenderin kógaldandyrý jáne jasyl aımaqtardy qurý boıynsha óńirlik josparlar bekitildi. 2021 jyldan bastap 2025 jylǵa deıin jyl saıyn 3 mln kóshet otyrǵyzylady. 2021-2022 jyldary 7 mln, al bıyl 1,1 mln kóshet otyrǵyzyldy. Osy jyldyń jeltoqsan aıyna deıin jospar tolyǵymen oryndalady», - dedi Erlan Nysanbaev.