Bıyl Májiliske úsh zań taza qazaq tilinde ázirlenip túsken

<p>ASTANA. KAZINFORM &mdash; Jyl basynan Parlament qaraýyna túsken zańdardyń ishinde úsheýi taza qazaq tilinde ázirlengen. Bul týraly depýtat Abzal Quspan Túrkistan qalasynyń erekshe mártebesi týraly zań jobasyn talqylaý kezinde aıtty.</p>

— Bul zańnyń birneshe ereksheligi bar. Byltyr áriptesimiz Únzıla Shapaqqyzy Úkimetke úlken depýtattyq saýal joldady. Sonda qazaq tilinde zań qabyldaý qajettigi, qoldanystaǵy zańdardyń qazaq tilindegi nusqasyn qaıtadan revızııa jasaý týraly másele kótergen. Sol saýalǵa Úkimet basshysynyń orynbasary 2024 jyly qazaq tilinde zań daıyndaýdy bastaıtyndaryn aıtyp, jaýap qatqan, — dedi ol Májilistiń jalpy otyrysynda.

Depýtattyń aıtýynsha, Úkimet ol ýádesin ishinara oryndaǵan.

— Bul Túrkistan qalasynyń erekshe statýsy týraly bıyl Májiliske taza qazaq tilinde ázirlenip túsken úsh zańnyń bireý. Bireýi — norma shyǵarmashylyq týraly zań, ekinshisi — arhıv isi týraly zań bolatyn. Endi úshinshisi — búgin qarastyryp otyrǵan Túrkistan qalasynyń erekshe statýsy týraly zań, — dedi Abzal Quspan.

Aıta keteıik, atalǵan qujat aıasynda Qoja Ahmet Iassaýı kesenesinen 100 metr radıýsta bıik ǵımarat salýǵa zańmen tyıym salynbaq.