Bıyl kúres túrlerinen el sportshylary qansha medal jeńip aldy

<p>ASTANA. KAZINFORM &ndash;&nbsp; Búgin Astanada Qazaqstan Respýblıkasynyń grek-rım, erkin jáne áıelder kúresi federatsııasynyń 2024 jyldyń qorytyndysyna arnalǵan esep berý konferentsııasy ótti.</p>

Jıynǵa QR Týrızm jáne sport mınıstrliginiń ókilderi, federatsııa basshylary, óńirlik kýres federatsııalarynyń ókilderi, bas jáne aǵa bapkerler, kúres mamandary qatysty. 

Foto: Kúnsultan Otarbaı/Kazinform

Konferentsııa barysynda osy jyldyń ózekti problemalary talqylanyp, ár óńir atqarylǵan jumys boıynsha esep berdi. Bas hatshysy Dımash Sultanov baıandama jasap, federatsııanyń jumysyna saraptama jasady.

- Osy jyly elimizdiń balýandary Olımpıada, Álem men Azııa birinshilikterinde tamasha óner kórsetti. Barlyq jas ereshelikteri boıynsha atalmysh dodalarda sportshylarymyz el qorjynyna 110 medal ákeldi. Demeý Jadyraev Parıj tórinde kúmisti oljalady, - dedi Dımash Sultanov.

Sonymen qatar QR Týrızm jáne sport mınıstrliginiń sheshimimen grek-rım, erkin jáne áıelder kúresi federatsııasy 2024 jyldyń eń úzdik federatsııasy bolyp tanylǵanyn da eske salyp ótti. 

Foto: Kúnsultan Otarbaı/Kazinform

Osydan birer kún buryn Astanada Týrızm jáne sport mınıstrligi jyl saıynǵy «Úzdik» premııasynyń jeńimpazdaryn marapattaǵan bolatyn. Onda grek-rım, erkin jáne áıelder kúresi federatsııasy «Jyldyń úzdik akkredıttelgen sport federatsııasy» atalymynda top jarǵan bolatyn. 

- Árıne, osy jylǵy federatsııa jumysyn qanaǵattandyrarlyq dep esepteımin. Áriptesterime alǵysymdy aıtamyn. Balýandarymyz jaqsy óner kórsetti. Jyldyń eń úzdik federatsııasy atandyq. Biraq, alda qyrýar jumys bar ekenin umytpaýymyz kerek. 2025 jyly biz budan da bıik jetistikterge qol jetkizemiz dep senemin, - dedi konferentsııa sońynda federatsııa prezıdenti Dáýlet Turlyhanov.

Foto: Kúnsultan Otarbaı/Kazinform

Kúresten halyqaralyq týrnırdiń jeńimpazdary anyqtalǵanyn jazǵan bolatynbyz.