Bıyl qumar oıynǵa salynǵandar 16 qylmys jasady — ІІM

<p>ASTANA. KAZINFORM &mdash; Byltyr qumar oıynǵa salynǵan adamdar 300 qylmys jasady. Bul týraly Parlament Májilisi janyndaǵy Qoǵamdyq palatanyń otyrysynda Іshki isteri mınıstriniń orynbasary Igor Lepeha aıtty.</p>

«Osy kezdesýge daıyndalý barysynda tergeý departamentimen naqty qylmystyq isterdi qaradyq. Іs materıaldary boıynsha lýdomanııaǵa shaldyqqan adamdardyń qandaı áreketke barǵanyn baıqaýǵa bolady. Mınıstrlik derekterine qaraǵanda, qumar oıynǵa táýeldi adamdar byltyr túrli 300 qylmys jasaǵan. Al bıyldyń basynan beri 16 qylmys tirkeldi», - dedi I. Lepeha oıyn bıznesi men lotereıa qyzmetin retteý taqyrybyna arnalǵan otyrysta.

Foto: Kazinform

Onyń aıtýynsha, byltyr qumar oıyndardyń saldarynan 2 kisi óltirý, 25 tonaý, 80 alaıaqtyq, 170 urlyq deregi anyqtaldy. 

«Osy jyly 16 qylmystyń ishinde bir kisi óltirý, 3 qaraqshylyq shabýyl, 3 tonaý, 3 alaıaqtyq jáne bir urlyq tirkeldi. Biz naqty qylmystyq isterdi qaraǵan edik. Ókinishke qaraı, bári osymen bitpeıdi. Lýdomanııa saldarynan shyǵyn somalary da óte joǵary. Sondyqtan másele óte kúrdeli ekenin atap ótken jón. Máselen, bir azamat uıymnyń 940 mln teńgesin qumar oıynǵa salyp jibergen. Budan bólek, adam óltirýge qatysty rezonansty derekter de bar. Oqıǵa Astanada bolǵan. Túnde áıeli uıyqtap jatqanda kúıeýi onyń telefonyn alyp, ondaǵy aqshany aýdara bastaǵan. Áıeli oıanyp ketken kezde, kúıeýi zaıybyn jáne onyń ápkesin óltirgen», - dedi mınıstrdiń orynbasary.

Eske salsaq, jaqynda Parlament Májilisinde «Qazaqstan Respýblıkasynyń keıbir zańnamalyq aktilerine oıyn bıznesi, lotereıalar jáne lotereıa qyzmeti máseleleri boıynsha ózgerister men tolyqtyrýlar engizý týraly» zań jobasy tanystyryldy. 

Elimizde 400 myńdaı adam býkmekerler men kazınolardyń turaqty klıentine aınalǵan.