Bıyl qumar oıyn uıymdastyratyn 9 myń platforma buǵattaldy

<p>ASTANA. KAZINFORM &ndash; Bıyl qumar oıyn uıymdastyratyn 9 myń platforma buǵattaldy. Bul týraly Kazinform-nyń YouTube arnasyndaǵy Bızdı&ntilde; orta podkastynda Qarjy monıtorıngi agenttiginiń asa mańyzdy ister jónindegi jedel ýákili, Preventsııa jáne taldaý ázirlemeleri departamentiniń qyzmetkeri Dáýren Múlikov aıtty.</p>

«Qazirgi ýaqytta gadjetterdiń, kompterlerdiń, ıaǵnı tsıfrlyq tehnologııalardyń damýyna baılanysty ınternet jelisinde onlaın oıyndar qaptap ketti. Olar Qazaqstan aýmaǵynda uıymdastyrylsa, onda tıisti shara qabyldap, qylmystyq is qozǵaımyz. Alaıda, olardyń basym bóligi shetelde, sheteldik platformalarda ornalasqan. Serverler de shetelde tur. Bul qıyndyq týǵyzady. Degenmen, olarmen de kúres júrgizip jatyrmyz. Mádenıet jáne aqparat mınıstrligimen birlesip, «Kıberqadaǵalaý» aqparattyq júıesine zańsyz oıyn platformalarynyń siltemelerin engizip, buǵattaımyz. Osy jyldyń ózinde 9 myńnan astam silteme atalǵan aqparattyq júıege engizildi», - dedi Dáýren Múlikov.

Onyń atap ótýinshe, bir kúnde 300 saıt buǵattalǵanymen olar avtomatty túrde sońyna 1 árip ne belgi qosyp, aınaly túrde qaıta ashylyp jatady. Sondyqtan agenttik mundaı jaıttyń qaıtalanbaýy úshin tıisti sharalar qabyldaý ústinde. Aldaǵy ýaqytta mundaı qumar oıyn platformalaryn jedel buǵattaý maqsatynda jasandy ıntellekt qoldanylmaq.

«Álemniń keıbir elinde onlaın qumar oıynǵa shekteý engizilmegen. Bizde shekteý bar. Ol memleketterde shekteý bolmaǵandyqtan onlaın qumar oıyndary ınternet arqyly tarala beredi. Sondyqtan biz ekinshi deńgeıli bankter arqyly bul máseleni sheshýge usynys jasadyq. Máselen, Oıyn bıznesi jáne lotareıany retteý komıteti óz saıtynda onlaın qumar oıynyn usynatyn saıttar týraly aqparatty ornalastyrady. Al ekinshi deńgeıli bankter atalǵan saıttarǵa aqsha aýdarýǵa tyıym salady», - dedi ol.

Osyǵan deıin qazaqstandyqtardyń ózin 10 jylǵa deıin qumar oıyndarynan shekteı alatyny týraly jazdyq.