Bıyl Qostanaı oblysynyń fermerlerine 57 mlrd teńge qarastyrylǵan - Úkimet basshysy
Oblys ákimdigi men ortalyq memlekettik organdar basshylyǵynyń qatysýymen ónerkásip, jylý energetıkasy, aýyl sharýashylyǵy, kólik, densaýlyq saqtaý jáne t.b. salalar boıynsha qabyldanyp jatqan sharalar qaraldy.
Úkimet basshysynyń 2022 jyldyń qyrkúıeginde Qostanaı oblysyna jasaǵan jumys saparynyń qorytyndysy boıynsha berilgen tapsyrmalardyń basym bóliginiń oryndalǵany atap ótildi. Sonymen birge keıbir ınfraqurylymdyq jobalardy júzege asyrý jalǵasyp jatyr.
«Halyqty aýyz sýmen qamtamasyz etý boıynsha jumystar jalǵasýda. Úkimet tarapynan qarajat ýaqtyly jáne tolyq kólemde bólinip jatyr. Ákimdik jumysty belgilengen merzimde aıaqtaýy qajet», — dedi Álıhan Smaıylov.
Ol sý obektileriniń lastanýyna jol bermeý maqsatynda káriz-tazartý qurylystaryn salý jáne rekonstrýktsııalaý jóninde tıisti sharalar qabyldaý tapsyrylǵanyn eske saldy.
«Ákimdik jáne quzyretti mınıstrlik tolyq qujattamasy bar jobalardy bıyl iske asyrýǵa kirisýi tıis. Josparlanǵan jobalar boıynsha qujattamany ázirleýdi jáne konkýrstyq rásimderdi ótkizýdi jedeldetý qajet», — dedi Premer-Mınıstr.
Keńestiń kún tártibine kóshken Álıhan Smaıylov byltyr qolaısyz tabıǵı-klımattyq jaǵdaılarǵa baılanysty agroónerkásiptik keshen úshin erekshe kúrdeli jyl bolǵanyn atap ótti.
«Osyǵan qaramastan, óńirde 4 mln tonnaǵa jýyq dándi daqyldar jınaldy. Bıylǵy jylǵa oblys fermerleri úshin bıýdjetten 57 mlrd teńge qarastyrylǵan, onyń ishinde 38 mlrd teńge sýbsıdııa túrinde bólingen. Ákimdik kóktemgi egisti júrgizý úshin barlyq sharalardy ýaqtyly qabyldaýy qajet», — dedi ol.
Premer-Mınıstr óńirdiń klımattyq jaǵdaılary men ekonomıkalyq turǵydan maqsatqa sáıkestigin eskere otyryp, iri sút-taýar fermalaryn damytýǵa qosymsha qarjy bólý múmkindigin qarastyrýdy tapsyrdy.
Onyń aıtýynsha, aýyl turǵyndarynyń tabysyn arttyrýǵa «Aýyl amanaty» jobasy da óz septigin tıgizedi.
«Úkimet Qostanaı oblysyna bıyl osy jobany iske asyrýǵa ótken jylmen salystyrǵanda 2 eseden artyq qarajat bóldi. 2023 jyly bólingen qarajat esebinen 300-ge jýyq jańa jumys orny ashylǵan bolatyn. Aǵymdaǵy jyly kem degende 600 jumys oryn qurý josparlanýda. Ákimdik kredıtter berip qana qoımaı, qosalqy sharýashylyqtardyń kooperatsııasyn da yntalandyrýy qajet», — dep tapsyrdy Álıhan Smaıylov.
Sonymen qatar Úkimet basshysy bıyl jalpy quny 127 mlrd teńge bolatyn 13 ónerkásiptik ınvestıtsııalyq jobany iske asyrý josparlanyp otyrǵanyn atap ótti. Osyǵan baılanysty ol ákimdikten josparlanǵan jobalardy sapaly iske asyrýdy qamtamasyz etýdi jáne tıisti ınfraqurylymdy júrgizýdi eskere otyryp, ındýstrııalyq aımaqty keńeıtý máselesin pysyqtaýdy talap etti.
Premer-Mınıstr Memleket basshysynyń tapsyrmasyna sáıkes Aqtóbe oblysynan Qostanaıǵa deıin jańa gaz qubyryn salý týraly sheshim qabyldanǵanyn atap ótti.
«Jobanyń tehnıkalyq-ekonomıkalyq negizdemesi ázirlenip, saraptamaǵa jiberildi. Energetıka mınıstrligi múddeli memlekettik organdarmen jáne QazaqGaz-ben birge osy baǵytta jumysty jedeldetýi qajet. Ákimdik óńirdi gazdyń qosymsha kólemimen qamtamasyz etýdi eskere otyryp, ınvestorlarmen olardyń jobalaryn iske asyrýdy úılestirý boıynsha jumys júrgizýi tıis», — dedi Álıhan Smaıylov.
Sonymen qatar byltyr tamyz aıynda Úkimet Amangeldi jáne Jangeldi aýdandaryn, Arqalyq, Jitiqara jáne Lısakov monoqalalaryn damytýdyń keshendi josparlaryn bekitti. Olardy iske asyrýǵa respýblıkalyq bıýdjetten 78 mlrd teńge qarastyrylǵan.
«Bul qarajat, eń aldymen, halyqtyń ómir súrý sapasyn jaqsartýǵa baǵyttalǵan. Ákimdik barlyq is-sharalardyń sapaly jáne ýaqtyly iske asyrylýyn qamtamasyz etýi kerek», — dep atap ótti Úkimet basshysy.
Sondaı-aq keńes barysynda logıstıkany damytý máselesi qaraldy. Atap aıtqanda, 2023 jyly óńirdiń avtojol salasynyń bıýdjeti 56 mlrd teńgeni qurady. Bul qarajatqa eldi mekenderdiń arasyndaǵy 700 km jolǵa jáne eldi mekenderdegi 299 kóshege jóndeý júrgizildi. Bıyl bul maqsattarǵa bıýdjetten 66 mlrd teńgeden astam qarjy qarastyrylǵan.
«Óńir úshin mańyzdy joba «Qostanaı – Denısovka» avtojoly kúrdeli jóndeýden ótti. Respýblıkalyq avtojoldar ýchaskeleri boıynsha jobalaý jumystary júrgizilýde. Olar – «Uzynkól – Troebratskoe», «Sarykól – Soltústik Qazaqstan oblysynyń shekarasy» jáne Ulytaý oblysynyń shekarasynan Arqalyq qalasyna deıingi avtojoldar. Aǵymdaǵy jobalar aıaqtalǵan soń aldaǵy ýaqytta «Qostanaı – Reseı Federatsııasynyń shekarasy» avtomobıl jolyn rekonstrýktsııalaý josparlanýda», — dedi Premer-Mınıstr.
Densaýlyq salasyn damytýǵa qatysty Álıhan Smaıylov buǵan deıingi jumys sapary kezinde bergen tapsyrmalardy iske asyrý sheńberinde oblystyq perınataldyq ortalyq salý jáne Tobyl qalasynda emhanany qarjylandyrý máseleleriniń pysyqtalǵanyn atap ótti.
«Jyl sońyna deıin ákimdik Densaýlyq saqtaý mınıstrligimen birlese otyryp emhanany paıdalanýǵa berip, perınataldyq ortalyqtyń qurylysyn bastaýy kerek», — dedi Úkimet basshysy.