Bıyl Qostanaı oblysyna 966 qandas kóship keldi
Bul belgilengen kvotadan úsh jarym ese artyq. Olardyń 90%-y Rýdnyı qalasyna qonystanǵan. Syrtqy ister mınıstrligine qarasty «Otandastar» qorynyń ókilderi óńirge jumys saparymen kelip, qatarymyzdy tolyqtyrǵan aǵaıynnyń turmys-tirshiligimen tanysyp qaıtty.
Gúlsına Qalmyrzaeva Rýdnyıǵa Ózbekstannan kóship keldi. Ol joǵary bilimdi dáriger. Biraz jyl boıy jergilikti aýrýhanada jumys istedi. Keıin jeke LOR kabınetin ashýdy uıǵardy. Ony jabdyqtaý úshin memleketten qaıtarymsyz 5 mıllıon teńge grant jáne 6 mıllıon teńge sýbsıdııa alǵan. Qazaqstanda ár adamǵa jeke isin ashýǵa múmkindik mol ekenin tilge tıek etti.
«Ózine unaıtyn jumysty dóńgeletip áketemin degen adamǵa memleket tarapynan barlyq jaǵdaı jasalǵan. Oǵan kózim jetti, sebebi sol kómekterdi alyp, kásibimdi júrgizip jatyrmyn», — deıdi jeke kásipker Gúlsına Qalmyrzaeva.
Kenshiler qalasyna kelgen qandastarymyz túrli salada eńbek etedi. Kóbi jeke kásippen aınalysady. Biri tigin tsehyn ashsa, endibiri túıe sharýashylyǵyn túletip, aımaqty shubatpen qamtamasyz etip otyr. Árıne olardy mazalaıtyn máseleler de joq emes.
«Qandastar negizinen qujat alý máseleleri, onyń ishinde yqtııarhat, azamattyq alý, óńirlik kvota boıynsha habaralasady. Qujat alýǵa ótinish berip, biraq áli jaýap almaǵandary da bar. Osyndaı máselelerdiń bári bizdiń nazarymyzda», — deıdi «Otandastar qory» KEAQ Qandastardy qoldaý departamenti dırektorynyń orynbasary Erkebulan Meńlibaev.
Tarıhı Otanyna oralǵan qandastarymyzdyń tez beıimdelip ketýine memleket barynsha jaǵdaı jasap jatyr. Azamattyq alý merzimi alty aıdan úsh aıǵa qysqardy. Bıyl úı salýyna nemese satyp alýyna utqyrlyq sertıfıkaty berile bastady. Onyń syrtynda jergilikti ákimdikter de, kásipkerler de kómek-qoldaý kórsetýge daıyn.
«Rýdnyı qalasyna jaqyn ornalasqan Beıimbet Maılın, Denısov degen aýdandar bar. Denısov aýdanynda 300 orynǵa arnalǵan qazaq mektebi bar. Endigi kezekte aýdan ákimi kóship kelýge nıetti qandastar úshin on úıge deıin satyp alýǵa daıyn ekenin aıtyp otyr», — dedi oblys ákiminiń orynbasary Rınat Muhametqalıev.
Osy aıda Qostanaı oblysyna qandastarǵa bólinetin óńirlik kvota 72-ge ulǵaıtyldy. Onyń jartysyna jýyǵy Rýdnyı qalasyna bólindi.