Bıyl Kókshetaýda JEO qurylysy bastalady
Úkimet otyrysynan keıin baspasóz máslıhatynda Energetıka mınıstri Almasadam Sátqalıevqa «Reseıdiń Qazaqstanda salatyn jańa JEO jobalary boıynsha jyl sońyna deıin Kókshetaýda qurylys bastalatyny ras pa?» degen saýal qoıyldy.
«Iá, buny rastaımyn, bıyl Kókshetaýda JEO qurylysyn bastaımyz. Al Semeı men Óskemende tehnıkalyq-ekonomıkalyq negizdeme ázirlenip jatyr. Jyl sońyna deıin bekitýdi josparlap otyrmyz jáne kestege sáıkes kelesi jyly JEO salýǵa kirisemiz. Bul — gaz otynymen jumys isteýge múmkindigi bar kómir stansalary, ıaǵnı saptamalardy aýystyrǵan kezde JEO-nyń gazben jumys isteýine múmkindik beretin rejım», — deıdi mınıstr.
Buǵan deıin Energetıka mınıstri Qashaǵannan 150 mlrd dollar talap etý máselesine pikir bildirgen edi.
Úkimet otyrysynda sondaı-aq elimizdegi janar-jaǵarmaı qory sóz boldy.