Bıyl KAZINFORM agenttigine 105 jyl tolady

<p>ASTANA. KAZINFORM &ndash; 2025 jyly 13 tamyzda elimizdegi eń kóne medıaresýrstardyń biri - Kazinform halyqaralyq aqparat agenttigine 105 jyl tolady. Agenttik ǵasyrdan astam ýaqyt boıy saıasat, ekonomıka, bilim, densaýlyq, sport, mádenıet jáne qoǵam tynys-tirshiligi týraly senimdi ári jedel aqparat kózi retinde múltiksiz eńbek etip keledi.</p>

Alǵashqy qazaq aqparat agenttigi 1920 jyly Orynbor qalasynda ROSTA-nyń Orynbor-Torǵaı bólimshesi negizinde ashylǵan edi. 1925 jyly agenttiktiń aty QazROST bolyp ózgerdi. Al 1937 jyly «QazTAG» degen atpen Qazaq KSR Mınıstrler Keńesiniń qaraýyna berildi.

Foto: Kazinform muraǵatynan

Agenttik QazTAG bolǵan jyldary Arkadıı Vıatıch-Kırıllov (1937-1938, repressııaǵa ushyrap, 1938 jyly atý jazasyna kesildi); Konstantın Nefedov (1939-1940); Júsip Altaıbaev (1953-1958); Keńesbaı Úsebaev (1959-1960); Qasym Sháripov, (1961-1974); Kákimjan Qazybaev (1977-1982); Jumaǵalı Ismaǵulov (1982-1987) jáne Amangeldi Ahmetalımov (1987-1997) syndy azamattar basshylyq etti.

Foto: Kazinform muraǵatynan

Alpys jyldan keıin 1997 jylǵy 10 qyrkúıekte «Qazaq aqparat agenttigi (QazAA)» respýblıkalyq qazynalyq kásiporny quryldy. 2014 jyldyń qańtarynda «QazAqparat» eldegi alǵashqy halyqaralyq aqparat agenttigi (HAA) mártebesine ıe boldy. Agenttik 2022 jyly QR Prezıdentiniń teleradıokesheniniń quramyna qosyldy.

Foto: Kazinform muraǵatynan

Kazinform jańalyqtary qazaq, orys, aǵylshyn, qytaı, ózbek tilderinde taratylady. Sonymen qatar, sheteldegi qandastarymyz úshin jańalyqtar latyn grafıkasynda jáne tóte jazýmen beriledi. 2004 jyldyń 14 aqpanynda «QazAqparat» ulttyq kompanııasynyń qazaq bólimshesi Qazaqstanda alǵash ret latyn álipbıi negizinde memlekettik tilde jańalyq taratýdy qolǵa aldy. Negiz retinde akademık Ábdýálı Qaıdar daıyndaǵan latyn grafıkasynyń úlgisi alyndy. Keıinnen osy nusqa mamandar arasynda «QazAqparat nusqasy» dep atalyp ketti. Sonyń arqasynda kırıllıtsa qarpin oqı almaıtyn shetelderdegi otandastarymyz tarıhı otanynda bolyp jatqan oqıǵalardy bilip otyrýǵa múmkindik aldy.

Foto: Kazinform muraǵatynan

Kazinform – Qazaqstandaǵy halyqaralyq deńgeıdegi jalǵyz agenttik. Onyń keńsesi Astanada ornalasqan jáne elimizdiń barlyq óńirinde menshikti tilshiler jumys isteıdi. Reseı, Qytaı, Túrkııa, Eýropa, Ázerbaıjan, Ózbekstan, Qyrǵyzstan jáne Iordanııada menshikti tilshileri bar. Bul elimizde jáne álemde bolyp jatqan jańalyqtardy jedel ári shynaıy taratýǵa múmkindik beredi.

Foto: Kazinform muraǵatynan

Agenttiktiń ambıtsııaǵa toly, biraq naqty oryndalatyn maqsaty bar — qurlyqtaǵy jetekshi aqparat agenttikteriniń biri bolý.