Bıyl qazan aıynan bastap birneshe jol aqyly bolady

<p>ASTANA. KAZINFORM &ndash; QR Kólik mınıstrligi bıyl 11 jol ýchaskesi aqyly bolatynyn jáne bul joldarda aqy alý júıesi qashannan bastap engiziletinin málim etti.</p>

«Qazir Qazaqstan Respýblıkasy aýmaǵynda jalpy uzyndyǵy 3,2 myń shaqyrym bolatyn 17 aqyly avtojol ýchaskesi bar. Bul ýchaskeler 2013-2023 jyldar aralyǵynda kezeń-kezeńimen paıdalanýǵa berildi. Olardyń ishinde «Astana-Şýchınsk» (211 km), «Astana-Temirtaý» (134 km), «Almaty-Qonaev» (42 km), «Almaty-Qorǵas» (295 km), «Astana-Pavlodar» (375 km), «Qonaev-Taldyqorǵan» (186 km), «Taraz-Qaınar» (238 km), «Shymkent-Qyzylorda» (447 km), «Shymkent-Taraz» (90 km), «Shymkent-Tashkent» (84 km), «Şýchınsk-Kókshetaý» (61 km), «Pavlodar-Qalbataý» (453 km), «Beıneý-Aqjigit» (85 km), «Oral-Samara» (56 km), «Pavlodar-Omby» (198 km), «Kókshetaý-Petropavl» (169 km) jáne «Oral-Saratov» (99 km) sııaqty mańyzdy magıstraldar qamtyldy. Atap aıtqanda, bıyl jol-jóndeý jumystarynyń aıaqtalýyna qaraı jalpy uzyndyǵy 2,2 myń shaqyrym bolatyn avtojoldyń 11 qosymsha ýchaskesinde aqyly júıeni engizý josparlanǵan», - delingen mınıstrliktiń Kazinform agenttigine bergen jaýabynda.

Osy ýchaskelerdiń ishinde myna joldar qamtylǵan: «Qyzylorda-Aral» (455 km), «Aqtóbe-Mártók» (92 km), «Qostanaı-Troıtsk» (163 km), «Aqtaý-Beıneý» (454 km), «Qostanaı-Denısovka» (169 km), «Shý-Býrylbaıtal» (184 km), «Úsharal-Dostyq» (180 km), «Balqash-Býrylbaıtal» (91 km), «Qandyaǵash-Maqat» (332 km), Taraz qalasyn aınalyp ótý (57 km) jáne Qaraǵandy qalasyn aınalyp ótý (48 km) joly.

«Bul joldarda aqyly júıeni engizý olardyń jaǵdaıy men qyzmet kórsetý sapasyn jaqsartýǵa, sondaı-aq qozǵalys qaýipsizdigin arttyrýǵa baǵyttalǵan. Qazirgi kezde jalpy uzyndyǵy 710 shaqyrym, ıaǵnı «Qyzylorda-Aral» (455 shaqyrym), «Aqtóbe-Mártók» (92 shaqyrym) jáne «Qostanaı-Troıtsk» (163 shaqyrym) avtojoldardyń úsh ýchaskesinde aqy alý júıesin (AAJ) engizý boıynsha normatıvtik-quqyqtyq aktilerdiń (NQA) jobalary ázirlendi. Osy ýchaskelerde AAJ engizý bıyldyń 1 qazanynan bastalady dep josparlanǵan. Sonymen qatar, jalpy uzyndyǵy 1,5 myń shaqyrym bolatyn qalǵan 8 jol ýchaskesi aqyly júıeni qosý úshin NQA jobalaryn kelisý jáne talqylaý satysynda tur», - dep atalyp ótken mınıstrlik aqparatynda.

Buǵan deıin aqyly joldarda kim tegin júre alatynyn jazǵan edik.

Kólik mınıstri Marat Qarabaev aqyly joldyń aqshasyn tólemegenderge avtomatty túrde aıyppul taǵaıyndaý qalaı iske asatynyn aıtty.