Bıyl Qazaqstanǵa Qytaıdan keletin týrıster sany 500 myńǵa deıin artýy múmkin

<p>ASTANA. KAZINFORM - Bıyl Astanada Dúnıejúzilik kóshpendiler oıyndary, Shymkentte gastronomııalyq festıval, Almaty oblysynda sharlar festıvali, óńirlerde alpınıada men baspasóz týrlaryn ótkizý josparlanyp otyr. Bul týraly QR Týrızm jáne sport mınıstrliginiń Týrızm ındýstrııasy komıtetiniń tóraǵasy Nurtas Káripbaev Ortalyq kommýnıkatsııalar alańynda habarlady.</p>

Týrıstik maýsymǵa daıyndyqtyń taǵy bir aspektisi - marketıngtik is-sharalar. Óńirlerde biregeı tabıǵı jáne mádenı kórikti jerlerge nazar aýdara otyryp, týrısterdi tartý úshin arnaıy baǵdarlamalar ázirlendi.

Elimizdiń týrıstik áleýetin nasıhattaý maqsatynda Qazaqstan Berlın, Dýbaı jáne Shanhaıdaǵy iri týrıstik jármeńkelerde tanystyryldy. Sonymen qatar Qazaqstan týraly iri halyqaralyq platformalarda da jıi aıtylýda. Sondaı-aq Almaty qalasy The New York Times nusqasy boıynsha úzdik 52 týrıstik baǵyttyń qataryna endi.

«Conde Nast Traveller jáne Wanderlust, Qazaqstandy 2024-shi jyly saıahattaýǵa arnalǵan álemdik destınatsııalardyń qataryna qosty. Oǵan qosa, Conde Nast Traveller Italia «Shymbulaq» taý kýrortyn TOP-5 taý shańǵysy destınatsııasyna engizdi. Osy jyldyń qańtar aıynda, el India Today nusqasy boıynsha «Úndi saıahatshylary úshin jetekshi baǵyt» ataǵyn aldy. Qazaqstan Skyscanner derekteri boıynsha Úndistan naryǵy úshin №1 destınatsııa bolyp tabylady, sondaı-aq bıyl oraza kezinde BAÁ týrısteri arasynda eń tanymal týrıstik baǵyttardyń kóshin bastady. Sáıkesinshe, Forwardkeys derekteri boıynsha Qazaqstan Qytaıdan keletin týrıster aǵynyn qalpyna keltirýdiń eń joǵary kórsetkishine ıe: ósim 212%, bul Qazaqstandy QHR azamattary úshin eń tanymal 50 týrıstik baǵyttyń qataryna qosady»,-dedi vedomstvo ókili.

2024 jyl Qytaıdaǵy qazaqstandyq týrızm jyly bolyp jarııalandy. 28-29 - naýryz aralyǵynda Beıjińde Týrızm jyly ashyldy, onyń aıasynda eki eldiń týrıstik bıznesiniń 300-den astam ókilderiniń qatysýymen forým ótti. Bıyl Qazaqstan týrızminiń túrleri boıynsha taqyryptyq aptalardy ótkizýdi, Qytaıdyń 7 iri qalasynda TOP-20 otandyq destınatsııalardyń tusaýkeserin, sondaı-aq Qazaqstannyń Qytaıdaǵy týrıstik áleýetin ilgeriletý jónindegi basqa da birqatar iri jobany qamtıtyn 30-dan astam is-shara ótkizý josparlanǵan. Nátıjesinde, bıylǵy qorytyndy boıynsha QHR-dan kelýshiler sany 500 myń adamǵa deıin ulǵaıýy múmkin.