Bıyl Qaraǵandy oblysynda 50 myńnan asa turǵyn jumyspen qamtylmaq

<p>QARAǴANDY. KAZINFORM &mdash; Qaraǵandy oblysynda bıyl 51 myń turǵyndy jumysqa ornalastyrý josparlanyp otyr. 5 aıda jumyspen qamtý sharalarymen 14 myń adam nemese 28% qamtyldy. Onyń ishinde 12 myńy jumysqa ornalastyryldy, dep habarlady oblys ákimdiginde ótken apparattyq keńeste Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekova.</p>

Turǵyndardy jumyspen qamtamasyz etý úshin ártúrli quraldar qoldanylady. Olardyń qatarynda ulttyq jobalar, «Urpaqtar kelisimsharty», «Kúmis jas», «Jastar praktıkasy», «Alǵashqy jumys orny» jumysqa ornalastyrý baǵdarlamalary qarastyrylǵan, sondaı-aq óz isin ashý kezinde azamattarǵa qoldaý kórsetiledi.

«1200-den astam qaraǵandylyq „Bastaý Bıznes“ jobasy boıynsha kásipkerlik negizderine oqytyldy. Ekinshi jartyjyldyqta jastar kásipkerligin damytý úshin 2,5%-ben 339 jeńildikti nesıe berý josparlanǵan», — delingen habarlamada.

Qazirdiń ózinde halyqtyń áleýmettik osal toptaryna jatqyzylǵan qaraǵandylyqtar 33 grant aldy. Memlekettiń qoldaýynyń arqasynda oblystyń ártúrli qalalary men aýdandarynda naýbaıhana, sport klýby, jylyjaı, terezelerge tor jasaý tsehy, ulttyq kıim óndirisi jáne t. b. ashyldy.

Oblysta múgedektigi bar jáne olarǵa qamqorlyq jasaıtyn adamdarǵa arnalǵan úsh jyldyq jańa joba iske qosyldy. «Terrıkon alqaby» ІT-hab bazasynda 300-den astam adam jańa tsıfrlyq mamandyqty ıegere alady. Oqytý tegin.

Sondaı-aq, aımaqta bos oryndar jármeńkeleri únemi ótkizilip turady. Odan da kóbirek halyqty qamtý úshin bul jármeńkeler adamdar kóp jınalatyn jerlerde júzege asyrylady.

Turaqty negizde Mansaptyq ortalyqtar bas bostandyǵynan aıyrý oryndarynan bosatylǵan jáne probatsııa qyzmetiniń esebinde turǵan adamdardy jumysqa ornalastyrý boıynsha jumys júrgizedi.

Bul rette áli de úıdi-úıine baryp, aralaý júrgiziledi. Jumyssyz jáne NEET-jastardy esepke alýǵa jáne olardy jumyspen qamtý sharalaryna jumyldyrýǵa múmkindik beredi.

— Jalpy júrgizilip jatqan sharalar jumyssyzdyq deńgeıin 4,2% deńgeıinde saqtaýǵa múmkindik berdi, bul respýblıkalyq kórsetkishten 0,5 paıyzdyq tarmaqqa tómen, — dep túıindedi spıker.

Qaraǵandy oblysynyń basshysy Ermaǵanbet Bólekpaev aýdan ákimderi men joba ákimshilerine jumys oryndaryn qurýdy jáne jumyssyzdardy jumysqa ornalastyrýdy baqylaýdy tapsyrdy.

— Qazir jastar úshin jumysqa ornalasýǵa barlyq jaǵdaı jasalǵan. Kóptegen baǵdarlamalar bar, olardy belsendi paıdalaný kerek. Bıyl kolledjder men joǵary oqý oryndaryn 20 myńnan astam stýdent bitiredi. Olardy jumyspen qamtý sharalarymen belsendi qamtyp, memlekettik qoldaýdyń barlyq sharalaryn usyný qajet, — dep atap ótti óńir ákimi.