Bıyl qansha etnıkalyq qazaq qandas mártebesin aldy
Eńbek jáne halyqty áleýmettik qorǵaý mınıstrligi málimetinshe, jyl basynan Qazaqstanǵa kelgen qandastardyń 45,4% – Qytaıdan, 38,9% – Ózbekstannan, 6% – Mońǵolııadan, 5,8% – Túrikmenstannan, 2,7% – Reseıden jáne 1,3% basqa elderden.
Osy jylǵy 1 jeltoqsandaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 57,1%-dy, eńbekke qabiletti jastan kishi 33,4%-dy jáne zeınetkerler 9,5%-dy quraıdy.
Eńbekke qabiletti jastaǵy qandastardyń ishinen bilim deńgeıi boıynsha 17,5%-y joǵary bilimdi, 25%-y orta kásibı bilimdi, 54,7%-y jalpy orta bilimdi, jáne 2,8%-ynyń bilimi joq.
Qonys aýdarǵan etnıkalyq qazaqtar respýblıkanyń túrli óńirlerine qonystandy.
Sonymen birge, qandastardy qonystandyrý úshin kelesideı eńbek kúshi tapshy óńirler anyqtaldy: Aqmola, Abaı, Qostanaı, Pavlodar, Shyǵys jáne Soltústik Qazaqstan oblystary.
Qonystandyrý óńirlerinde 2024 jylǵa arnalǵan qandastardy qabyldaý kvotasy 3 033 adamdy quraıdy. Bıylǵy 1 jeltoqsandaǵy jaǵdaı boıynsha qonystandyrý óńirlerine 2 961 qandas qonys aýdardy.
Joǵaryda atalǵan óńirlerde qonystanǵan qandastarǵa kóshýge sýbsıdııa túrinde memlekettik qoldaý sharalary usynylady – bir mezgilde otaǵasyna jáne otbasynyń árbir múshesine 70 AEK (258,4 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge – bir jyl ishinde 15-ten 30 AEK (55,3-den 110,7 myń teńgege deıin) mólsherinde.
Jyl basynan beri 2 624 qandasqa túrli qoldaý sharalary kórsetildi. Atap aıtqanda, 794 adam turaqty jumysqa ornalastyryldy.
Sonymen qatar, erikti qonys aýdarýdyń tıimdiligin arttyrý maqsatynda azamattar men qandastardy eńbek kúshi tapshy óńirlerge qonys aýdarýǵa qatysatyn jumys berýshilerdi qoldaý boıynsha ınstıtýtsıonaldyq sharalar qabyldandy. Turǵyn úı satyp alý, salý úshin nemese ıpotekalyq turǵyn úı qaryzdary boıynsha bastapqy jarnanyń bir bóligin jabý úshin ekonomıkalyq utqyrlyq sertıfıkaty turǵyn úı qunynyń 50%-y nemese bir otbasyna 4,28 mln teńgege deıin mólsherinde birjolǵy óteýsiz jáne qaıtarymsyz negizde engizildi. Osy jylǵy 1 jeltoqsanyndaǵy jaǵdaı boıynsha 2 449 adam sertıfıkat aldy.
Esterińizge sala keteıik, ótken jylda pılottyq rejımde Qazaqstan elshilikteri arqyly «bir tereze» qaǵıdaty boıynsha qandas mártebesin berý tetigi iske asyryldy. Pılottyq joba sheńberinde elimizge barý, jumys orny, turǵyn úı berý múmkindikteri týraly máseleni sheshýge jáne respýblıka aýmaǵyna kirmeı-aq qandas mártebesin alýǵa bolady. Búgingi tańda etnıkalyq qazaqtardan jańa formatta 22 666 ótinish qabyldandy.
Eńbek jáne halyqty áleýmettik qorǵaý mınıstrligi 2025 jyly qandas qabyldaý kvotasynyń jobasyn kópshilik talqylaýyna shyǵarǵanyn jazǵan bolatynbyz.