Bıyl esirtki tasymaldaǵany úshin kámeletke tolmaǵan 30 jasóspirim ustaldy
«Jazǵy demalys jalǵasýda. Balalaryńyzǵa muqııat bolyńyzdar. Olardyń ýaqytyn jáne paıdalanatyn ınternet-resýrstardy baqylańyzdar. Vırtýaldy álemde arandatýlar jıi kezdesedi. Jasóspirimder keıde óz áreketteriniń saldaryn bilmeı, ońaı aqsha tabýdyń tuzaǵyna túsip jatady.
Bir qaraǵanda bul zııansyz graffıtı syzbasyna uqsaıdy. Shyn máninde áleýmettik jeli arqyly esirtki satyp alýǵa bolatyn tanymal arnanyń jarnamasy bolýy yqtımal», — dep eskertti ІІM-nen.
Mamandar kúmán týdyratyn chattar, geolokatsııalary bar belgiler, oryndardyń ártúrli fotosýretteri men úılerdiń qabyrǵalaryndaǵy túrli syzbalarǵa nazar aýdarý qajettigin aıtqan.
«Sonymen qatar, dári-dármekter, folga, shyny tútiksheler jáne basqa da qaptamalarǵa zer salyńyz. Munyń bári esirtki tutynýǵa arnalǵan qural bolýy múmkin.
Shamadan tys aqsha kórseńiz onyń qaıdan kelgenin oılańyz. Balańyzdy salaýatty ómir saltyna baýlyp, túsindirý jumystaryn júrgizińiz», — delingen habarlamada.