Bıyl elordaǵa qosymsha 300 avtobýs satyp alynady
Úkimet otyrysynda Premer-Mınıstr Oljas Bektenov qala basshysynan: «Qoǵamdyq kólik problemalary bar. Qazir irgeles eldi mekenderden adamdar ary-beri kóp júredi. Josparda jergilikti halyqtyń belsendi ósimi eskerildi me?» dep suraǵan edi.
Saýalǵa jaýap bergen Jeńis Qasymbektiń aıtýynsha, «Astana qalasynyń mańyna qyzmet kórsetetin marshrýttyq jeli men qoǵamdyq kólik sany únemi ózgerip, artyp keledi.
Sonymen qatar, osy jyldyń qańtar aıynda qabyldanǵan jańa bas jospardy ázirleý kezinde elorda halyq sanynyń ósýimen qatar, aglomeratsııaǵa tıisti eldi mekenderdiń turǵyndarynyń kóbeıýi de eskerildi.
Jyl saıyn elorda halqy 50-60 myń adamǵa kóbeıedi. Sonymen qatar, kún saıyn qalaǵa oblystyń 200 myńǵa jýyq turǵyny jáne 30 myńnan astam avtomobıl kiredi.
«Kóshi-qon aǵyndaryn retteý úshin jáne jol jelisine júktemeni azaıtý úshin, bas josparda elordaǵa barlyq radıaldy kireberisterde kólik-retteý pýnkttaryn ornalastyrý kózdelgen. Qazirgi ýaqytta elordanyń qala mańyndaǵy aımaqtaryna 26 marshrýt qyzmet kórsetedi. Ótken jyly qalada qosymsha 400 avtobýs jumys isteı bastady. Jalpy, byltyr kún saıyn qalaǵa 900 avtobýs shyqsa, qazir 1 300 avtobýs shyǵady., Bıyl taǵy 300 avtobýsqa tolyqtyrylady dep kútilýde. 15-20 jańa marshrýt ashylady. Onyń 25 paıyzy — aglomeratsııaǵa baratyn kólik dálizderi. Bul bizge qala mańyndaǵy marshrýttardyń sanyn kóbeıtip, eldi mekender ishindegi marshrýttardy uzartýǵa jáne aglomeratsııa turǵyndarynyń júris-turysyn tezdetýge etýge múmkindik beredi», — dedi elorda ákimi.