Bıyl elimizde Ózbekstannyń mádenıet kúnderi uıymdastyrylady

<p>ASTANA. KAZINFORM &ndash; Bıyl elimizde Ózbekstannyń mádenıet kúnderi uıymdastyrylady. Bul týraly elordada Premer-Mınıstrdiń orynbasary &ndash; Syrtqy ister mınıstri Murat Nurtileýmen keńeıtilgen quramdaǵy kelissózderden keıingi brıfıngte Ózbekstan Syrtqy ister mınıstri Bahtıer Saıdov aıtty.</p>

«Ekonomıkalyq jáne saýda qatynastary bizdiń qarym-qatynasymyzdyń mańyzdy baǵyttary sanalady. Qazaqstan - bizdiń Ortalyq Azııadaǵy eń iri saýda seriktesimiz. Sońǵy jyldary ózara taýar aınalymy eki ese ósti. Kóp uzamaı biz bul kórsetkishti taǵy 2-3 ese arttyrý joldaryn talqyladyq. Ótken jyldyń qarasha aıynda Halyqaralyq ónerkásiptik yntymaqtastyq ortalyǵyn qurý týraly úkimetaralyq kelisimge qol qoıyldy. Bul, óz kezeginde, qosylǵan qun tizbegin qurý arqyly jańa naryqtardy birlesip ashýǵa jáne olarǵa básekege qabiletti ónimdi eksporttaýǵa múmkindik beredi», - dedi ol.

Onyń atap ótýinshe, eki eldiń kólik jáne tranzıttik áleýetin arttyrý - aldyda turǵan ózekti mindetterdiń biri. Sondaı-aq, shekaralas óńirlerde ornalasqan ótkizý pýnktterin jańǵyrtý, olardyń ótkizý múmkindikterin keńeıtý, kedendik jáne basqa da qyzmetterdi tsıfrlandyrý máseleleri de bar.

«Barshańyzǵa belgili, klımattyń ózgerýi aıasynda sý resýrstaryn paıdalaný máseleleri basymdyqqa ıe bolýda. Sondyqtan Ortalyq Azııadaǵy transshekaralyq ózen sýlaryn utymdy basqarýda zamanaýı tehnologııalardy engizýge, Halyqaralyq Araldy qutqarý qorynyń quqyqtyq jáne qurylymdyq negizderin nyǵaıtýǵa basa nazar aýdardyq», - dedi ózbek mınıstri.

Sonymen qatar ol mádenı-gýmanıtarlyq baılanys ózbek-qazaq qatynastarynyń negizi sanalatyndyǵyn, ótken jyldyń maýsym aıynda Ózbekstanda qazaq mádenıetiniń kúnderi saltanatty túrde atalyp ótkenin aıtty.

«2024 jyly Qazaqstanda Ózbekstannyń mádenıet kúnderin uıymdastyramyz», - dedi Bahtıer Saıdov.