Bıyl elimizde qansha kómir óndiriledi
«Bıyldyń sońyna deıin 112,7 mln tonna kómir óndirý josparlanǵan. Kómir óndirýshi kásiporyndardyń jedel derekteri boıynsha osy jyldyń 9 aıynda 77,7 mln tonna kómir óndirildi. Bul aqparat statıstıkalyq derekter jarııalanǵannan keıin bekitiledi. Mınıstrlik kommýnaldyq-turmystyq sektordyń kómirmen qamtamasyz etýge jaýapty. Kommýnaldyq-turmystyq sektorǵa jiberiletin kómirdiń baǵasy eki ken qazbasynda ósti. Eger byltyr «Shubarkól Kómir» kenishindegi tonnasy 7100 teńgeni qurasa, bıyl ol 8000 teńgege deıin kóterildi. «Qarajyra» kenishinde 8500 teńgeden 8700 teńgege deıin ósti. Al «Maıkóbe» men «Shubarkól Premıým» kenishinderinde byltyrǵy baǵasy ózgerissiz qaldy. Ken ornynda «Maıkóbe» kómiri 7100 teńgeni, «Shubarkól Premıýmda» 9000 teńgeni qurady», - delingen mınıstrliktiń Kazinform agenttigine bergen jaýabynda.
Bul turǵyda jergilikti atqarýshy organdardyń derekterine sáıkes, elimizdiń ár óńirinde kómir baǵasy 8000-nan 28000 teńgege deıin aýytqıdy. Sebebi kómir kenishinen tym alysta ornalasqan shalǵaıdaǵy óńirler bar. Baǵanyń qalyptasýy kómirdiń markasyna, tutynýshyǵa deıin tasymaldaıtyn qashyqtyqqa, kólik túrine, temirjol tarıfterine jáne temirjol tuıyqtarynyń ornalasýyna baılanysty.
«Jylý berý maýsymyna elimizde kómirge qajettilik shamamen 8,2 mln tonnany quraıdy. Onyń ishinde kommýnaldyq-turmystyq qajettilikke — 2,2 mln tonna, halyqqa — 6 mln tonna. Bıylǵy 7 qazandaǵy jaǵdaı boıynsha óńirlerge temirjol jáne avtomobıl kóligimen 3,3 mln tonnaǵa jýyq kómir jetkizildi. Óńirlerdi kómirmen qamtamasyz etý kórsetkishi jyldyq josparǵa qatysty 40,2% boldy. Kómirdi jetkizý jylý berý maýsymy barysynda jalǵasa beredi, ıaǵnı osy aralyqta óńirlerde qajet otyn kólemi qamtamasyz etiledi», - dep atalyp ótken vedomstvo aqparatynda.
Budan buryn habarlanǵandaı, Úkimet basshysy Oljas Bektenov turǵyndar kómirdi turaqty baǵamen satyp alýy úshin eshqandaı qıyndyq bolmaýy kerek ekenin tapsyrdy.