Bıyl elimizde 221 shaqyrym jylý jelisi jóndeledi

<p>ASTANA. KAZINFORM &ndash; Keı óńirlerde jylý jelilerin jóndeýge Úkimet rezervinen qarajat bólý máselesi pysyqtalyp jatyr. Tolyǵyraq Ónerkásip jáne qurylys mınıstri Qanat Sharlapaev aıtyp berdi.</p>

«Bıyl barlyq qarjylandyrý kózderi esebinen 221 shaqyrym jylý jelilerin jóndeý josparlanyp otyr. Bul maqsatqa shamamen 128 mlrd teńge qarastyryldy. Onyń ishinde respýblıkalyq bıýdjet esebinen 72,3 mlrd teńge (126 km), jergilikti bıýdjetten 39 mlrd teńge jáne tabıǵı monopolııalar sýbektileriniń ınvestıtsııalyq baǵdarlamalary esebinen 17 mlrd teńge (69 km)», - dedi Qanat Sharlapaev Úkimet otyrysynda.

Sondaı-aq, mınıstr qosymsha 233 shaqyrym jylý jelilerin jóndeýge 162 mlrd teńgege daıyn jobalardyń baryn aıtty.

«Odan bólek, Qarjy mınıstrligimen birlesip Ulytaý oblysy, Aqmola oblysy, Shyǵys Qazaqstan oblysy, Batys Qazaqstan jáne Pavlodar oblystarynda jylý jelilerin jóndeýge Úkimet rezervinen qarajat bólý máselesi pysyqtalyp jatyr», - deıdi ol.

Aıta ketsek, elimizde jylý jelileriniń 53%-y tozǵan. Osyǵan oraı 2030 jylǵa deıin tozyǵy jetken jylý jelilerin 43% azaıtý josparlanyp otyr.