Bıyl eginge qandaı qaýip-qater tónýi múmkin — sarapshy boljamy

<p>ASTANA. KAZINFORM — Sáken Seıfýllın atyndaǵy Qazaq agrotehnıka ýnıversıtetiniń eginshilik jáne ósimdik sharýashylyǵy kafedrasynyń qaýymdastyrylǵan professory, PhD doktory Ádilbek Noǵaev bıyl egis naýqanyna tónetin qaterdi atady.</p>

«Aýyl sharýashylyǵy taýaryn óndirýshilerde sapaly tuqymnyń joqtyǵy úlken qaýip tóndiredi, óıtkeni byltyr kúz jaýyn-shashyndy boldy. Kóptegen daqyl tamyr jaıyp, aýyl sharýashylyǵy taýaryn óndirýshiler sapaly tuqym ala almady. Sonyń saldarynan bıyl keıbir tuqymnyń tapshylyǵy bar, aldaǵy qaýip-qater osyǵan baılanysty, óıtkeni sapaly tuqym — mol eginniń kepili», — dedi Ádilbek Noǵaev.

Mamannyń aıtýynsha, tuqym sebý kezeńinde topyraqta ylǵal bolýy mańyzdy.

«Bul — óte mańyzdy kórsetkish, óıtkeni ótken jyly bizde jaýyn-shashyn ara-tura boldy, qysta jer qatyp, jaýǵan qar muz qabyǵynyń ústine tústi. Keıbir aımaqta qar erigen kezde ol jerge tolyq sińgen joq», — dep tolyqtyrdy sarapshy.

Buǵan deıin sarapshy sý tasqyny saldary egin egý naýqany merzimine áser etpeıtinin aıtqan edi.

«Bıyl elimizde sý tasqyny jaǵdaıy óte qıyn boldy. Sý basqan aımaqta Soltústik Qazaqstan, Aqmola, Qostanaı, Aqtóbe oblystary sııaqty astyq sebetin óńirler boldy. Bul rette, atalǵan óńirlerdegi biraz aýyl sharýashyǵy taýaryn óndirýshiler men fermerlerde egis jumystaryn tıisti merzimde ótkizýge qatysty suraqtar týyndady. Aıta ketý kerek, jalpy sý tasqyny aldaǵy egin egý naýqanyna aıtarlyqtaı áser etpeıdi. Óıtkeni, sý tasqynynan zardap shekken aýdandarda sý basqan aýyl sharýashylyǵy alqaptarynyń aýdany sonshalyqty kóp emes», — dedi Á. Noǵaev.

Aıta keteıik, bıyl Úkimet rezervinen sharýalarǵa 60 mlrd teńge qarjy bólinedi.

Sondaı-aq, sharýalarǵa dızel 15%-ǵa tómen baǵamen satylmaq.

Bul týraly keshe Aýyl sharýashylyǵy mınıstri Aıdarbek Saparov málim etti.

Bıyl kóktemgi egis jumystaryna Úkimet 140 mlrd teńge bólip otyr.