Bıyl brakonerler memleketke 13 mlrd teńge shyǵyn keltirdi

<p>Jyl basynan beri elimizde qorshaǵan ortany qorǵaý salasynda 300 myńnan astam quqyq buzýshylyq tirkeldi. Bul týraly ІІM ÁPK tabıǵatty qorǵaý polıtsııasy tobynyń erekshe tapsyrmalar jónindegi aǵa ınspektory Álisher Jarmaǵambetov málim etti, dep habarlaıdy Kazinform.</p>

«Qorshaǵan ortany qorǵaý salasyndaǵy ýákiletti organ - Ekologııa jáne tabıǵı resýrstar mınıstrligi. Polıtsııa qorshaǵan ortany qorǵaý is-sharalaryn júrgizýge jáne brakonerlikpen baılanysty qylmystyq isterdi tergeýge kómek kórsetedi. Jyl basynan beri polıtsııa qyzmetkerleri 300 myńnan astam ákimshilik quqyq buzýshylyqty anyqtady. Ekologııalyq quqyq buzýshylyq boıynsha 304 sotqa deıingi tergeý bastaldy. Memleketke keltirilgen shyǵyn 13 mıllıard teńgeden asady», - dedi ol ІІM baspasóz qyzmeti alańynda ótken brıfıngte.

Jalpy, onyń atap ótýinshe, brakonerliktiń sebebi – adamdardyń ózderiniń zańsyz áreketteriniń ekojúıege ákeletin saldarynyń aýyrlyǵyn tolyq túsinbeýi. Orman, janýarlar, balyq nemese jer qoınaýy tabıǵı resýrstaryn baqylaýsyz paıdalaný eldiń búkil ekojúıesine keri áserin tıgizedi.

«Osy sebepti memlekettik organdar birqatar uıymdastyrýshylyq jáne zańnamalyq is-sharany qolǵa alýda. Joǵary táýekel maýsymdarynda reıdtik is-sharalardy ótkizýge erekshe nazar aýdarylady. Mysaly, balyq pen sútqorektilerdiń ýyldyryq shashatyn kóktemgi kezeńinde, alǵashqy qardyń kúzgi kezeńinde jáne janýarlardyń erekshe áljýazdyǵy kezeńinde qorǵaý jumystary kúsheıtiledi», - dedi Álisher Jarmaǵambetov.