Bıyl bilim berý salasynda 7,3 mln qarajat jymqyrylǵan – Antıkor

<p>ASTANA. KAZINFORM &ndash; Sybaılas jemqorlyqqa qarsy qyzmet bilim berý salasynda jymqyrý faktileriniń aldyn alý jáne jolyn kesý boıynsha júıeli jumys júrgizip keledi. Bul týraly agenttikitiń baspasóz qyzmeti málim etti.</p>

«Sybaılas jemqorlyq táýekelderine júrgizilgen syrtqy taldaý barysynda bıýdjet qarajatyn josparlaý jáne ıgerý kezeńderinde pedagogterdiń eńbegine aqy tóleý qorynan bıýdjet qarajatyn jymqyrý shemalary ashyldy. Bıýdjettik ótinimderdi qalyptastyrý protsesterin avtomattandyrýdyń, buzýshylyqtardy baqylaý jáne aldyn alý tetikteriniń, sondaı-aq aqparattyq júıelerdiń birkelki bolmaýyna baılanysty kóptegen faktiler múmkin bolyp otyr», — dep habarlady agenttikten.

Sybaılas jemqorlyqtyń sebepteri men jaǵdaılaryn joıý maqsatynda Bilim, Qarjy jáne Tsıfrlyq damý mınıstrlikterimen birlesip Jol kartasy iske asyrylyp jatyr.

Keshendi jumys aıasynda bıýdjetti josparlaý protsesin tsıfrlandyrý úshin quqyqtyq jaǵdaılar jasaldy.

Birinshi kezekte, «Býhgalterlik operatsııalardyń biryńǵaı qoımasy» jobasy engizildi, Ulttyq bilim berý bazasynda memlekettik organdarmen ıntegratsııalanǵan «Pedagog portfolıosy» elektrondyq modýli ázirlendi.

Sondaı-aq satyp alynatyn býhgalterlik esep júıelerine biryńǵaı tehnıkalyq talaptar kózdelgen, táýekelderdi basqarý júıeleri jáne t. b. engizilgen.

«Іske asyrylǵan tsıfrlyq sheshimderdiń arqasynda óńirlik basqarmalar men bilim bólimderi aı saıyn býhgalterlik esep jáne qazynashylyq júıeleriniń esepterin salystyryp otyrady. Budan basqa, memlekettik aýdıt organdary tarapynan jalaqyny kóterýmen birge derbes jáne banktik derekterdi burmalaýmen ushtasqan pedagogterdiń eńbekaqy tóleý qorynan kúdikti tólemderdiń qashyqtyqtan monıtorıngi engizildi», - delingen habarlamada.

Qazir árbir tólem operatsııasy óziniń elektrondy izin qaldyrady, bul jymqyrýdy analıtıkalyq jolmen anyqtaýǵa múmkindik beredi.

Sonymen qatar, aǵymdaǵy jyly Agenttiktiń bastamasy boıynsha bıýdjettik protsesterdi avtomattandyrýǵa, qazynashylyq júıesin bilim berý uıymdarynyń býhgalterlik esep júıelerimen ıntegratsııalaýǵa, tólem qujattaryna qol qoıý kezinde bıometrııany engizýge baǵyttalǵan tsıfrlyq sheshimder engizildi.

Bul sharalar qarajattyń jumsalýyna tıimdi baqylaý ornatýǵa múmkindik beredi.

Eger joba engizilgenge deıin byltyrǵy ister boıynsha Antıkor anyqtaǵan zalal mıllıardtaǵan somamen (17,3 mlrd) ólshense, bıylǵy jyly jymqyrý aıtarlyqtaı azaıtyldy (7,3 mln).

Qazirgi ýaqytta Agenttik bilim berý mekemeleriniń qyzmetkerleri arasynda qarjylyq buzýshylyqtardyń aldyn alýǵa jáne profılaktıkaǵa baǵyttalǵan túsindirý is-sharalaryn júrgizýde.