Bıyl bıdaı alqaby 429 myń gektarǵa qysqardy
«Ózderińiz biletindeı, 2023 jyly tabıǵattyń aýyr klımattyq jaǵdaıy sharýalardyń qarjylyq jaı-kúıine áser etti. Memleket basshysynyń tapsyrmasy boıynsha zardap shekken fermerlerdi qoldaý úshin Úkimet tarapynan barlyq qajetti sharalar qabyldandy. Búgingi tańda 2024 jylǵa arnalǵan basty mindet - kóktemgi egis jumystaryn ýaqtyly jáne sapaly júrgizý. Ol úshin mınıstrlik barlyq qajetti sharalardy qabyldap jatyr. Kerekti memlekettik organdar men uıymdardy, sondaı-aq oblystar men qalalar ákimderiniń orynbasarlaryn tarta otyryp, óńirlerde kóktemgi egis naýqanyn júrgizý jumystaryn úılestirý jónindegi jedel shtab quryldy», - dedi mınıstr.
Aıdarbek Saparovtyń atap ótýinshe, mınıstrlik salada aýqymdy taldaý júrgizgen. Nátıjesinde oryn alyp otyrǵan problemalar jáne olardyń paıda bolý sebepteri anyqtaldy. Jumystyń nátıjeleri boıynsha birqatar júıelik problem belgili boldy.
«Aıtalyq, agroónerkásiptik keshenniń qarqyndy damýyn tejep turǵan máselelerdiń biri - ósimdik sharýashylyǵynda ártaraptandyrýdyń durys júrgizilmeýi. Ol úshin mınıstrlik buǵan deıin oblystar ákimdikterine ártaraptandyrý boıynsha ındıkatorlardy bergen bolatyn, olar baqylaýda bolýy kerek. Osy jumysty eskere otyryp, oblystar ákimdikteriniń derekteri boıynsha osy jyly 23,8 mln gektar alańda aýyl sharýashylyǵy daqyldaryn ósirý josparlanǵan. Bul 2023 jylǵy kórsetkishten 209,6 myń gektarǵa az», - dedi ol.
Máselen, onyń dereginshe, bıdaıdyń egistik alańdary ótken jyl 13,7 mln gekter bolsa, bıyl 13,3 mln gektar bolady. ıAǵnı, 429,2 myń gektarǵa qysqartyldy. Qysqartylǵan alańdarda áleýmettik mańyzy bar jáne joǵary rentabeldi daqyldar alańdaryn ulǵaıtý kózdelgen.
«Oblystar ákimdikteriniń jedel derekteri boıynsha maıly daqyldar alańyn 385,7 myń gektarǵa ulǵaıtý josparlanǵan. Bul jalpy egis alańyn 3,2 mln gektarǵa deıin jetkizýge múmkindik beredi. Onyń ishinde kúnbaǵys sııaqty áleýmettik mańyzy bar daqyl alańyn 60 myń gektarǵa ulǵaıtý jáne olardy 1,2 mln gektarǵa deıin jetkizý kútiledi. Budan basqa, qant qyzylshasy sııaqty áleýmettik mańyzy bar daqyl alańyn 12 myń gektarǵa ulǵaıtý kózdelgen. Bıyl qant qyzylshasynyń aýdany 25 myń gektardy quraıdy. Sonymen qatar óńirlerde berik azyqtyq bazany qurý boıynsha jumystar júrgizilýde, bul úshin aǵymdaǵy jyly azyqtyq daqyldar alańyn 68,3 myń gektarǵa ulǵaıtyp, olardy 3,2 mln ga deıin jetkizý josparlanǵan», - dedi Aıdarbek Saparov.