Bıyl aýyl sharýashylyǵy salasyna rekordtyq qarjy bólindi – Oljas Bektenov

<p>ASTANA. KAZINFORM &ndash; Úkimet basshysy Oljas Bektenov bıylǵy egis naýqanynan jınalǵan ónimderdi jetkizý, saqtaý men ótkizý boıynsha birqatar tapsyrma berdi.</p>

«Memleket basshysynyń tapsyrmasy boıynsha bıyl kóktemgi egis jáne kúzgi jıyn-terin jumystaryn ýaqytyly jáne sapaly júrgizý úshin qajetti sharalardyń barlyǵy qabyldandy. Atap aıtqanda, aýyl sharýashylyǵy salasyn qarjylandyrý kólemi alǵash ret rekordtyq 580 mlrd teńgege deıin jetti. Bıýdjet qarajaty eginshilerdi tikeleı nesıelendirýge, paıyzdyq mólsherlemeni arzandatýǵa jáne forvardtyq satyp alýǵa baǵyttaldy. Kelesi jyly qarjylandyrý kólemin 700 mlrd teńgege deıin jetkizýdi josparlap otyrmyz», - dedi Oljas Bektenov Úkimet otyrysynda.

Premer-mınıstrdiń málimdeýinshe, bıyl aýyl sharýashylyǵy tehnıkasyn lızıngpen satyp alýǵa 120 mlrd teńge quıyldy.

«Aldaǵy jyly bul kórsetkishti 200 mlrd teńgege deıin jetkizý josparda bar. Sondaı-aq, dıqandar tuqymmen, jeńildikti otyn jáne tyńaıtqyshtardyń jetkilikti kólemimen qamtamasyz etildi. Endigi basty mindet – jınalǵan ónimdi saqtaý men ótkizý. Aýyl sharýashylyǵy mınıstrligi oblys ákimdikterimen birlesip, jınalǵan astyqty tókpeı-shashpaı der kezinde tasymaldaýdy, ony keptirip, elevatorlarǵa jetkizýdi qamtamasyz etýi qajet», - deıdi ol.

Sondaı-aq, Oljas Bektenov astyq qabyldaý kásiporyndary táýlik boıy jumys rejımine kóshý kerektigin aıtty.