Bıyl Astananyń bes aýdanynda ruqsat etilmegen qoqys tastaıtyn 221 oryn joıyldy

<p>ASTANA. KAZINFORM - Elordada stıhııalyq polıgondarmen kúres turaqty túrde júrgizilip keledi. Jyl basynan beri qalanyń bes aýdanynda 162 myń tonna qoqys jınalyp, polıgondarǵa shyǵaryldy, dep habarlaıdy Astana ákimdiginiń resmı saıty.</p>

Elordanyń árbir aýdanynda kún saıyn ruqsat etilmegen polıgondardyń bolýyna monıtorıng júrgiziledi. Jyl basynan beri qala jáne oǵan irgeles aýmaq boıynsha 221 ýchaske joıylyp, 162 myń tonnaǵa jýyq qoqys shyǵaryldy.

Mysaly, Almaty aýdany boıynsha 115 ýchaske joıylyp, 55 myń tonnaǵa jýyq qoqys shyǵaryldy (7 842 reıs).

Baıqońyr aýdanynda 10 ýchaske joıylyp, 8 myń tonnaǵa jýyq qoqys shyǵaryldy.

Esil aýdany boıynsha 18 ýchaske joıylyp, 20 myń tonnaǵa jýyq qoqys shyǵaryldy.

Saryarqa aýdany boıynsha 39 stıhııalyq qoqys tastaıtyn oryn pysyqtalyp, ol jerlerden 38 myń tonnaǵa jýyq qoqys shyǵaryldy. Jumys jalǵasyp jatyr.
Nura aýdanynda joıylǵan 39 ýchaskeden 40 myń tonna qoqys shyǵaryldy.

Astanada ruqsat etilmegen qoqys úıindilerinen qoqys jınaýǵa arnalǵan qalalyq QTQ polıgonynyń janynda ýaqytsha alań belgilendi, ol Alash, 64 tas jolynda ornalasqan.

iKomek arqyly qurylys alańdarynan qoqysty shyǵarý jáne ruqsat etilmegen oryndarǵa tastaý faktileri belgilenip, quqyq qorǵaý organdarymen birlesken reıdtik is-sharalar júrgiziledi.

Jyl basynan beri jalpy paıdalaný oryndaryn lastaǵany úshin 9 myńǵa jýyq quqyq buzýshy anyqtaldy, olarǵa 136 mln teńgeden astam somaǵa aıyppul salyndy. Sonymen qatar qoqysty ruqsatsyz túsirgeni úshin 161 júk kóliginiń júrgizýshisi ákimshilik jaýapkershilikke tartylyp, 5 mln 200 myń teńgeden astam somaǵa aıyppul salyndy.

Zańsyz polıgondardy joıý jumystary jalǵasýda. Sonyń ishinde jańa oshaqtardyń paıda bolýyna jol bermeý boıynsha sharalar qabyldanýda.

Esterińizge sala keteıik, «Taza Qazaqstan. Astana – tazalyq pen tártiptiń úlgisi» aýqymdy ekologııalyq aktsııasy aıasynda qalany sanıtarlyq tazartý, nóser jáne aryq kárizderin tazartý, kóshelerdi, trotýarlardy, oramishilik aýmaqtardy, qoǵamdyq keńistikter men aýlalardy tazalaý jumystary júrgizilýde.

Sondaı-aq jasyl jelekterdi kútip ustaý jáne otyrǵyzý, saýda nysandaryna irgeles aýmaqtardy jınaý, ruqsat etilmegen polıgondardy joıý jáne t. b. jumystar júrgizilýde. Sonymen qatar elordada Taza Astana jańa áleýmettik jobasy iske qosyldy. Joba quqyqtyq tártip, abattandyrý, kógaldandyrý, sanıtarlyq tazalaý, kóppáterli turǵyn úılerdiń, úı janyndaǵy, oramishilik jáne aýla aýmaqtarynyń kirme toptarynyń tazalyǵy máseleleri boıynsha júıeli jumys jasaýǵa baǵyttalǵan.