Bıyl Astanada 58 myńǵa jýyq jumys ornyn ashý kózdelip otyr: Elorda ákimi Prezıdentke esep berdi

<p>ASTANA. KAZINFORM &ndash; Memleket basshysy Astana qalasynyń ákimi Jeńis Qasymbekti qabyldady, dep habarlaıdy Aqordanyń <a href="https://www.akorda.kz/kz/memleket-basshysy-astana-kalasynyn-akimi-zhenis-kasymbekti-kabyldady-2521153" target="_blank" rel="noopener">baspasóz</a> qyzmeti.</p>

Qasym-Jomart Toqaevqa elordanyń áleýmettik-ekonomıkalyq jáne ınfraqurylymdyq damýy jóninde málimet berildi.

Astana qalasynyń ákimi barlyq negizgi ekonomıkalyq kórsetkishter boıynsha oń dınamıka baıqalatynyn aıtty.

Byltyr tartylǵan ınvestıtsııa kólemi 1,6 trıllıon teńgeni qurady. Óńdeý ónerkásibi, bilim, medıtsına, logıstıka, kólik jáne basqa da salalarda iske asyrylǵan jobalardyń nátıjesinde 1,8 myń jumys orny ashyldy.

Ótken jyly JOLTAP jobasy aıasynda 6 myńǵa jýyq azamat jumysqa ornalasty. Al bıyl jumyspen qamtylatyn azamattardyń sanyn 2 ese ulǵaıtý, ıaǵnı 12 myń adamnan asyrý josparlanyp otyr. Jalpy 2024 jyly 58 myńǵa jýyq jumys ornyn ashý kózdelgen.

Sonymen qatar Prezıdentke jylytý maýsymynyń barysy týraly da baıandaldy. Byltyr kúzde «Ońtústik-Shyǵys» gaz jylý stantsııasyn, «Turan» gaz jylý stantsııasynyń birinshi kezegin jáne úshinshi JEO-ny iske qosý nátıjesinde jylý qala boıynsha uzaq ýaqyttan beri alǵash ret artyǵymen berilip jatyr. Elordanyń tynys-tirshiligin qamtamasyz etetin bul nysandardyń qýaty – saǵatyna 1140 gıgakalorııa.

Memleket basshysyna bıyl «Telman» gaz jylý stantsııasynyń birinshi kezegi jáne «Turan» gaz jylý stantsııasynyń ekinshi kezegi, úshinshi JEO-nyń kómirmen jylytylatyn bóliginiń iske qosylatyny týraly málimet berildi. Bul nysandar qalany qosymsha 600 Gkal/saǵat jylý qýatymen qamtamasyz etedi.

Budan bólek, Jeńis Qasymbek áleýmettik nysandardyń (mektepter, oqýshylar saraılary, balabaqshalar, medıtsınalyq ortalyqtar, jeńildikpen beriletin turǵyn úıler) qurylysy, apatty jaǵdaıdaǵy eski úılerdi súrý, qurylysy uzaqqa sozylǵan nysandardy salyp bitirý, turǵyn úı alaptaryn damytý, qalany abattandyrý jáne kógaldandyrý jumystary týraly aıtty.

Prezıdent Qasym-Jomart Toqaev elordany odan ári damytý jóninde birqatar tapsyrma berdi.