Bıyl Aral teńizine 1,38 mlrd tekshe metr sý keldi

<p>ASTANA. KAZINFORM — Sý resýrstary jáne ırrıgatsııa mınıstri Soltústik Araldy qalpyna keltirý jobasynyń ekinshi kezeńine daıyndyq boıynsha keńes ótkizdi.</p>

Halyqaralyq Araldy qutqarý qorynyń Qazaqstandaǵy atqarýshy dırektsııasynyń keńsesinde ótken kezdesýge HAQQ sarapshylary men jobany ázirleýshi mamandar qatysty.

Mınıstr jobanyń tehnıkalyq-ekonomıkalyq negizdemesin ázirleý barysy jáne Soltústik Aral teńizindegi sý resýrstaryn ulǵaıtý jáne turaqtandyrý jumysymen tanysty.

Foto: Sý resýrstary mınıstrligi

Joba úsh negizgi baǵyttan turady.

Birinshi baǵyt teńizde jáne oǵan jaqyn aımaqta balyq aýlaý men sý ortasynyń jaǵdaıyn jaqsartýdy, sondaı-aq Syrdarııa ózeniniń atyrabyndaǵy sýly-batpaqty jerlerdi turaqtandyrýdy kózdeıdi.

Sý ınfraqurylymy jetildirilip, Soltústik Aral men Syrdarııa atyrabyndaǵy gıdrologııalyq jaǵdaıy jaqsarady. 

Ekinshi baǵyt — Qyzylorda oblysynda balyq sharýashylyǵyn, mal sharýashylyǵyn, týrızmdi jáne orman otyrǵyzýdy damytý arqyly ornyqty ekonomıkalyq, áleýmettik jáne ekologııalyq qyzmetti qoldaý. 

Úshinshi baǵytta Aral-Syrdarııa basseıninde sý resýrstaryn basqarý júıesi jaqsarady dep kútilip otyr. 

Kezdesý qorytyndysy boıynsha mınıstr TEN-di merziminen keshiktirmeı ázirleý jóninde birqatar usynys aıtty, sondaı-aq Aral aımaǵynda jobaǵa qatysty qoǵamdyq tyńdaý ótkizýdi tapsyrdy.

«Ázirlenip jatqan joba — Syrdarııa ózeniniń arnasyn retteý jáne Soltústik Araldy saqtaý jónindegi aýqymdy jobanyń jalǵasy. Ol 2002-2010 jyldar aralyǵynda iske asyp, búkil Aral óńirine oń áserin tıgizdi. Ekinshi kezeń Soltústik Araldy turaqty sýmen qamtamasyz etýden bastap ekonomıkalyq jáne áleýmettik jobalardy damytýǵa deıingi túrli baǵyttardy qamtıdy», — dedi Sý resýrstary jáne ırrıgatsııa mınıstri Nurjan Nurjigitov.

Esterińizge sala keteıik, 2024 jyldyń basynan bastap Soltústik Aral teńizine 1,38 mlrd tekshe metr sý keldi.