Bıyl Almaty taýlarynda jańa 3 kempıng-aımaq ashylady
Almaty qalasynyń Týrızm basqarmasy agenttik saýalyna jaýap bere otyryp, 2025 jyly qoljetimsiz jerlerde kún panelderimen jabdyqtalǵan úsh kempıng-aımaǵyn qurý josparlanǵanyn habarlady.
- Kempıng-aımaqtarynyń ornalasý oryndary qazirgi ýaqytta kelisý kezeńinde, - delingen basqarma jaýabynda.
Aıta keteıik, byltyr qyrkúıek aıynda Almaty taýlarynyń Alpıngrad alańda kezekti kempıng-aımaq ashylǵan bolatyn.
Sonymen qatar Týrızm basqarmasynyń málimetinshe, Almatyda aldaǵy úsh jylda 5 615 nómirge arnalǵan 37 qonaq úı salý josparlanǵan. Onyń ishinde 1 477 nómir bolatyn 12 nysannyń qurylysy qazirgi ýaqytta júrip jatyr. Al qalǵan 25 nysan jobalaý kezeńinde.
Jospar boıynsha qurylys jumystary úsh jylda aıaqtalady:
* 2025 jyly – 10 qonaq úı (1 097 nómir);
* 2026 jyly – 15 qonaq úı (2 604 nómir);
* 2027 jyly – 12 qonaq úı (1 914 nómir).
Buǵan deıin Almatyda 365 qonaq úı, 11443 nómer jáne 22019 tósek-oryn bar ekenin jazǵan edik.