Almaty oblysynda týrıster sany rekordtyq kórsetkishke jetti

<p>ALMATYTY. KAZINFORM &mdash; Almaty oblysy saıahatshylar sany boıynsha bıyl rekord ornatty. Jyl basynan beri aımaqqa bir jarym mln-nan týrıst kelgen. Osylaısha ótken jylmen salystyrǵanda bul kórsetkish 31 paıyzǵa ósken. Syrttan kelgen qonaqtardyń kóbisi Almaty shaharyna aıaldaǵan. Bul týraly Jibek joly telearnasynyń jańalyqtarynda aıtyldy.</p>

Jeke ınvestıtsııa esebinen 24 týrıstik nysan ashylǵan

Úndistandyq Ram Prabhýdyń bul Almatyǵa ekinshi sapary. Alǵash kelgende qalanyń ásem jerlerin aralaǵan. Al bul joly arnaıy jospar quryp, qysqy Shymbulaqty tamashalaýǵa kelipti.

— Saıahat men úshin úlken terapııa. Bizde Úndistanda qys múldem joq. Sondyqtan Qazaqstanǵa kelip izdegenimdi tapqandaımyn. Taý, taza aýa. Adamdary qandaı qonaqjaı. Mundaı tabıǵat janyma daýa bolyp jatyr, — deıdi saıahatshy Ram Prabhý. 

Óńirge saıahattap kelgenderdi negizinen taýly aımaqtar qyzyqtyrady. Ásirese Shymbulaq taý shańǵy kýrorty, Kólsaı, Іle-Alataý ulttyq parki men Sharyn shatqalyna baratyndar kóp. Bul tıisinshe ınfraqurylymdy damytýdy talap etedi.

— Eń aldymen qonaq úı sanyn arttyrý basty maqsat. 2024 jyly jeke ınvestıtsııalardyń arqasynda 24 týrıstik nysan ashyldy, onyń ishinde 14 qonaqúı, 4 glempıng, 4 hostel jáne 2 qonaq úı bar, bul qosymsha 495 nómirdi qamtamasyz etti. Sonymen qatar, qazirgi ýaqytta qosymsha 4 426 nómirdi qamtamasyz etetin 30 jańa qonaqúı qurylysy boıynsha jobalar júzege asyrylyp otyr, — deıdi Almaty qalasy Týrızm basqarmasy basshysynyń orynbasary m.ý.a. Erkebulan Abıhan. 

Bıyl shahardaǵy týrızm salasyn damytýǵa qala bıýdjetinen 4,7 mıllıard teńge bólindi. Ári 72 mlrd. teńgeden astam ınvestıtsııa tartylǵan. Nátıjesinde salyq túsimderi de artyp, bıylǵy 8 aıda bul kórsetkish 62 mlrd teńgeden asty. Bul ótken jyldyń osy kezeńimen salystyrǵanda 39,4 paıyzǵa artyq.

—  Biz buryn týrızm salasyn damytý úshin sheteldik iri ınvestorlarǵa senim arttyq. Qazir bul úderis ózgerdi. Búginde qazaqstandyq kásipkerler týrızmge kóńil bólip ınfraqurylymǵa barynsha ınvestıtsııa salýda. Buǵan birden bir sebep týrısterdiń synı kózqarasy men talaptary. Bul shynymen kásipkerlik naryqty yntalandyryp otyr, — deıdi Qazaqstan týrıstik qaýymdastyǵynyń dırektory Rashıda Shaıkenova.

Qalaýyn tapsa, týrızm de el ekonomıkasyn órge súıreıtin sala. Álemdik tájirıbe týrızımniń kirisi tek munaı eksporty, munaı men avtomobıl óndirisine ǵana jol beretinin kórsetken. Demek, Qazaqstannyń týrıstik áleýeti joǵary. Sondyqtan bul salany qoldaý men damytý el saıasatynyń basym baǵyty bolyp qala bermek.

Buǵan deıin habarlanǵandaı, Shymbulaqta qysqy maýsym 7 jeltoqsan kúni ashylady.