Bıyl áleýmettik tólemder mólsheri 18,3%-ǵa artty

<p>ASTANA. KAZINFORM &ndash; Balalardy áleýmettik qoldaý negizi áleýmettik táýekelder týyndaǵan kezde kórsetiledi. Onyń ishinde ana men balany áleýmettik qoldaýdyń kópdeńgeıli júıesi qalyptastyrylǵan. Memleket tarapynan 5 túrli járdemaqy tólenedi jáne Memlekettik-áleýmettik saqtandyrý qorynan 2 túrli áleýmettik tólem tólenedi. Bul jaıly QR Eńbek jáne halyqty áleýmettik qorǵaý mınıstrligi Áleýmettik kómek departamenti dırektorynyń orynbasary Ǵalııa Jabagına OKQ alańynda ótken dóńgelek ústel barysynda aıtty.</p>

Múgedektigi bar nemese asyraýshysynan aıyrylǵan jaǵdaıda áleýmettik járdemaqylar men tólemder QR Konstıtýtsııasy boıynsha áleýmettik qamsyzdandyrýdyń kepildigi retinde beriledi. Bıylǵy jospar boıynsha áleýmettik tólemder 4,4% otbasylarǵa berilýi tıis. Osyǵan memlekettik bıýdjetten 2 trln 285 mlrd teńge qarjy qarastyrylǵan. Byltyrǵa qaraǵanda bul qarajat 18,3%-ǵa artyq. Aǵymdaǵy jyldyń 4 aıynda 3 mln astam otbasy áleýmettik járdemaqy men tólemaqy aldy.

«Sonyń ishinde jumys isteıtin ata-analarǵa beriletin mindetti deńgeıdegi jumys berýshilerdiń qarajaty esebinen áleýmettik aýdarymdar negizinde áleýmettik saqtandyrý qorynan júktiligi jáne bosanýyna baılanysty tabysynan aıyrylǵan jaǵdaıda 1 rettik áleýmettik tólem tólenedi. Bıylǵy jyly bundaı tólem 285 myńnan astam analarǵa tólenetindigi kútip otyrmyz. Aǵymdaǵy 4 aıdyń ishinde bul tólemdi 90 myńnan astam adamǵa tólendi. Bala týǵanda beriletin bir rettik áleýmettik járdemaqy mólsheri de ulǵaıdy. Eger de bıylǵy jyly 1,2,3 týylǵan balaǵa 140 myń teńge, 4 jáne odan da joǵary balalarǵa 232 myń teńgeden astam áleýmettik járdemaqy beriledi. Jyl basynan beri bul tólem 136 myń otbasyǵa taǵaıyndalǵan», – dedi spıker.

Jumys istemeıtin ata-analar úshin bala 1,5 jasqa tolǵanǵa deıin áleýmettik járdemaqy taǵaıyndalady. Onyń mólsheri týylǵan balanyń kezektiligine baılanysty 21 266 teńgeden 32 859 teńgeni quraıdy. Al, jumys isteıtin ata-analarǵa sońǵy 2 jyldaǵy ortasha aılyq tabysynyń 40%-n quraıdy. Olardyń zeınetaqy jarnalaryn sýbsıdııalaý kózdelgen. Kópbalaly otbasylarǵa járdemaqy tólenedi.

"Járdemaqy mólsheri – 4 balasy bar otbasy úshin 59 183 teńgeden 8 balasy bar otbasylar úshin 118 144 teńgege deıin balalar sany boıynsha saralanǵan. Al odan da kóp balasy bar otbasylar úshin bul soma ár bala sanyna baılanysty 14 768 teńgege artyp otyrady. Bıyl bul járdemaqy 601,8 myń otbasyna tólenedi, bul maqsattarǵa 474,8 mlrd teńge qarastyrylǵan", - dedi Ǵalııa Jabagına .

Kópbalaly analardyń bedelin arttyrý úshin ómir boıy aı saıynǵy memlekettik járdemaqy taǵaıyndalady, ol tabysyna qaramastan «Kúmis alqa» jáne «Altyn alqa» alqalarymen marapattalǵan áıelderge tólenedi. Bıyl bul járdemaqyny 237 myń 598 anaǵa tóleý josparlanyp otyr. Bul maqsatqa respýblıkalyq bıýdjetten 70 mlrd teńge qarastyrylǵan.

Sondaı-aq múgedektigi bar 547 myńnan astam adam áleýmettik járdemaqy alyp otyr.