Bıyl Alakól kýrort aımaǵyna poıyzdar 12 baǵyt boıynsha qatynaıdy

<p>ASTANA. KAZINFORM &mdash; Osy jazda QTJ 4,2 mln astam jolaýshyny tasymaldaýdy josparlap otyr. Bul týraly &laquo;Jolaýshylar tasymaly&raquo; AQ baspasóz qyzmetá málimdedi.&nbsp;</p>

Almaty qalasynda Alakól kóli baǵytyndaǵy jazǵy tasymaldardy uıymdastyrý boıynsha QTJ jáne «Jolaýshylar tasymaly» AQ basshylyǵy, týrıstik operatorlar jáne demalys bazalarynyń ıeleriniń qatysýymen keńeıtilgen keńes ótti. Sondaı-aq, otyrysqa «Atameken» UKP, Kólik mınıstrligi temirjol jáne sý kóligi komıtetiniń, salalyq qaýymdastyqtardyń ókilderi shaqyryldy.

2024 jyldyń jaz aılarynda QTJ ótken jyldyń sáıkes kezeńimen salystyrǵanda kýrorttyq aımaqtarǵa jolaýshylar tasymalyn ulǵaıtýdy jáne 4,2 mln-nan astam jolaýshyny tasymaldaýdy josparlap otyr.

Alakól kóliniń baǵytynda poıyzdar Astana, Almaty, Shyǵys Qazaqstan jáne Abaı oblystarynan 12 baǵyt boıynsha qatynaıtyn bolady. Sondaı-aq, bıyl alǵash ret bul baǵytta Qyzylordadan poıyz júredi. On baǵyt boıynsha «Jolaýshylar tasymaly» AQ poıyzdary, al eki baǵyt boıynsha — jeke tasymaldaýshylar quramy júretin bolady. Ulttyq tasymaldaýshynyń poıyzdarynyń quramy tolyǵymen aýany baptaý júıesimen jabdyqtalǵan vagondardan quralady.

«Temirjol kóligi elimizdiń týrızm salasyn damytýda sheshýshi ról atqarady. Biz jyl saıyn Alakól kýrorttyq aımaǵyna jolaýshylardyń tasymaldaýǵa degen suranysy artqanyn baıqaımyz. Sondyqtan osy jazǵy maýsymǵa Alakól kóline deıingi poıyzdardaǵy oryndardyń sanyn arttyrý maqsatynda, ótken jylmen salystyrǵanda 16 myńǵa, ıaǵnı 270 myń orynǵa deıin ulǵaıtý týraly sheshim qabyldadyq», — dep atap ótti, «Jolaýshylar tasymaly» AQ Basqarma Tóraǵasy Jánibek Taıjanov.

Alakól baǵytyndaǵy poıyzdar týrıster úshin tanymal Jalańashkól, Aqshı jáne Beskól stantsııalarynda toqtaıdy. Onda jolaýshylardyń jaılylyǵy men qaýipsizdigin qamtamasyz etý úshin qajetti jaǵdaılar jasalǵan: perrondar ulǵaıtyldy, kútý zaldary men kassalar jóndeldi. Jolaýshylarǵa yńǵaıly bolý úshin stantsııalarda kassırlerdiń aýysymdyq jumysy uıymdastyryldy. Sondaı-aq, bıletterdi bilet.railways.kz saıttynda komıssııasyz satyp alýǵa bolady. Al bıletter bolmaǵan jaǵdaıda jolaýshy «Kútý paraǵy» qyzmetin paıdalana otyryp, poıyzda bos orynǵa bılet satyp alý úshin kezekke tura alady. Bul qyzmet bilet.railways.kz saıtynda nemese «Jolaýshylar tasymaly» AQ bılet kassalarynda aqysyz negizde qol jetimdi.

«Qazirgi ýaqytta Ulttyq tasymaldaýshy jyljymaly quramdy jazǵy tasymaldaýǵa belsendi daıyndalyp jatyr. Jeldetý jáne aýany baptaý júıelerin qaıta konservatsııalaý, aýa súzgilerin aýystyrý, sýmen jabdyqtaý júıesin tazartý jáne dezınfektsııalaý, vagondardyń elektr jabdyqtaryn tekserý, tambýrlardy, tıtandardy, jylytý júıeleriniń qubyrlaryn jáne basqa da bólshekterdi syrlaý, sondaı-aq, vagondardyń shanaqtaryn syrtqy jýý boıynsha jumystar júrgizilip jatyr», —delingen habarlamada.

Keńeste Pavlodar, Shymkent jáne Qyzylorda qalalarynan Alakól kóline deıin birjolǵy poıyzdardy uıymdastyrý, týroperatorlardyń bıletterdi jóneltýge deıin 180 táýlikten bastap brondaý jumystaryn júrgizý, ıntermodaldyq tasymaldardy damytý boıynsha yntymaqtastyq máseleleri talqylandy.

«Jolaýshylar tasymaly» AQ týroperatorlarmen turaqty negizde keńester ótkizedi. Bıyl bundaı kezdesý ekinshi ret uıymdastyryldy.