Bıyl Aqtóbede qaı joldar jóndeledi
Respýblıkalyq mańyzy bar jol qurylysy
Aqtóbede respýblıkalyq mańyzy bar jol uzyndyǵy 1800 shaqyrymnan asady. 2021 jyly «Aqtóbe-Atyraý» tasjolynyń «Aqtóbe-Qandyaǵash» aralyǵynda qurylys-montajdaý jumysy bastalyp, kúni búginge deıin jalǵasyp jatyr. Joba eki ýchaskege bólindi. Atap aıtqanda 11-52 km jáne 52-100 km aralyǵy. Bıyl bul jumys tolyq aıaqtalyp, tapsyrý kózdelgen.
— Tek tasjol qoldanysqa berilip qana qoımaı, jaryqtandyrý, temir qorshaýlar salý, jol belgilerin ornatý jumysy atqarylady. Bul tórtjolaqty joldyń uzyndyǵy — 96 shaqyrym. Joba aıasynda 18 kópir men 76 sý ótkizý qubyry salynýy tıis. Qazirgi ýaqytta sý ótkizgish qubyrlardy oryndaý kórsetkishi 87% quraıdy. Kópir qurylysy jáne ótpeler salý kórsetishi 78% bolyp tur. Bul joldy 2023 jyldyń 4 toqsanynda tapsyrý qajet edi. Alaıda jol-qurylys materıaldary qymbattap, jobalaý-smetalyq qujattamaǵa túzetý júrgizildi. QR QM Memlekettik kirister komıtetimen aýdıtorlyq tekserý júrgizildi jáne jobalyq-smetalyq qujat memlekettik saraptamanyń oń qorytyndysyn aldy. Osyǵan baılanysty jobanyń aıaqtalý merzimi 2024 jyldyń 4 toqsanyna deıin uzartyldy. Qarjylandyrý — Azııa damý banki esebinen. Búgingi tańda Aqtóbe — Qandyaǵashty qaıta qurý ýchaskesine 358 adam men 185 birlik arnaıy tehnıka jumyldyrylǵan, — dedi «QazAvtoJol» UK» AQ AOF dırektory Aıbol Danaǵul.
Sonymen birge bıyl óńirde «Aqtóbe-Qarabutaq-Ulǵaısyn» jolynyń bir bóliginde qaıta jańartý jumysy bastalady.
— Bul joldyń uzyndyǵy — 262 km. Jol qurylysyn júrgizý úshin barlyǵy 7 ýchaskege bólindi. Onyń 28 qashyrym bolatyn bir ýchaskesinde merdiger mekeme anyqtaldy. Merdiger topyraq karerleri, asfalt-beton zaýytynyń ornalasatyn jeri, vahtalyq qalashyq aýmaǵy belgilenip jatyr. Bıyl 28 shaqyrymnyń oń jaq bóliginde topyraq jumysy aıaqtalady. Sonymen birge sý ótkizý qubyry men kópirlerde jumys bastalady. Taǵy 28 shaqyrym bolatyn ekinshi ýchaskesinde joba daıyn, merdiger anyqtalady. Jol óte nashar bolǵan soń bıyl aǵymdaǵy jóndeý júrgiziledi, — dedi Aıbol Danaǵul.
Al Qandyaǵash-Shalqar baǵytyndaǵy jol qurylysy jalǵasady. Byltyr Shalqar qalasynan bastap 20 shaqyrymy jóndelse, bıyl ony 75 shaqyrymǵa jetkizý josparlanǵan. Sonymen birge jol qarama-qarsy baǵytta da bastalýy múmkin.
Oblystyq mańyzy bar jol qurylysy
Sý tasqyny kezinde Aqtóbede oblystyń mańyzy bar 8 joldan sý ótken. Qazirgi kezde sol 8-diń altaýynda sý tartylyp, jol ýaqytsha qoldanysqa berildi. Al eki ýchaskede baılanys joq.
— Shubarqudyq — Oıyl — Qobda — Sol-Iletsk tasjolynyń 365-366 shaqyrymynda sý joldyń ústinen ótti. Bul jerde áli de sý júrip jatqan soń qozǵalys jabyq tur. Jaqyn ornalasqan eldimeken turǵyndary aınalma jolmen qatynap júr. Sonymen birge Aqtóbe-Bolgarka-Shubarqudyq tasjolynyń 48 jáne 117 shaqyrymdarynda sý joldyń ústinen ótti. Sý deńgeıi túsken soń qalpyna keltirý jumysy júrip jatyr. Tek jeńil kóliktiń júrýine bolady, — dedi Aqtóbe oblystyq Jolaýshylar kóligi jáne avtomobıl joldary basqarmasy basshysynyń bólim basshysy Bekbolat Nurashev.
Sonymen birge óńirde oblystyq mańyzy bar «Shubarqudyq — Oıyl — Qobda — Sol-Iletsk» tasjolynyń 164-168 shaqyrymy aralyǵyndaǵy joldy sý shaıyp ketti. 4 shaqyrym jolmen qatar Oıyl ózeni arqyly ótýge múmkindik beretin kópir de jaramsyz kúıge tústi.
Qazaqstan jol ǵylymı-zertteý ınstıtýtynyń mamandary arnaıy zertteý jumysyn júrgizip, qorytyndysyn berdi. Jańa jol salynǵansha aınalma joldy paıdalanýǵa berý josparlanǵan.
Buǵan deıin habarlaǵanymyzdaı, oblystyq jáne aýdandyq mańyzy bar 25 jol ýchaskesin jáne 12 kópirdi salý, jóndeýge respýblıkalyq bıýdjetten 10 mlrd teńgeden astam qarjy suraldy.