Bıyl Aqtóbe oblysynda 827 otbasy baspanaly boldy

<p>ASTANA. KAZINFORM &mdash; Ortalyq kommýnıkatsııalar qyzmetinde ótken baspasóz máslıhatynda Aqtóbe oblysynyń ákimi Ashat Shaharov halyqty turǵyn úımen qamtamasyz etý máselesine toqtaldy.</p>

— Mańyzdy mindetterdiń biri — halyqty turǵyn úımen qamtamasyz etý. Memleket basshysy tapsyrmasyna sáıkes osy baǵytta Úkimet qoldaýymen bıýdjetten bólingen 12,3 mlrd teńgege oblysta 827 otbasyǵa páter berildi, — dedi Ashat Shaharov óńirdiń áleýmettik-ekonomıkalyq damýy týraly esep bere turyp.

Ákimniń esebinshe, «Baqytty otbasy» jáne «Shańyraq» baǵdarlamasy aıasynda 225 otbasy baspana aldy. Onyń ishinde, 118 otbasy áleýmettik osal topqa jatady. 

— Keler jyly 975,0 myń sharshy metr turǵyn úı paıdalanýǵa berý josparlanǵan. Sonymen qatar, «Aqtóbe jastary» baǵdarlamasy aıasynda 70 jas otbasy úıli bolady dep otyrmyz, — dep túsindirdi A. Shaharov.

Buǵan deıin Hromtaýda ınvestıtsııalyq aımaq qurylatyny belgili boldy.

Aıta keteıik, aldaǵy jyly Aqtóbe óńiri 1 trln teńge ınvestıtsııa tartýdy josparlap otyr.

Sondaı-aq, aldaǵy jyly Aqtóbe oblysyndaǵy 24 aýyl gazben qamtylady.