Bıyl Aqmola oblysynda 5,4 mıllıon gektarǵa tuqym sebiledi
Oblystyq aýyl sharýashylyǵy jáne jer qatynastary basqarmasy basshysynyń orynbasary Erkesh Álenovtyń aıtýynsha, zamanaýı tehnıkany qoldaný egis sapasyn qamtamasyz etýge, aýyl sharýashylyǵy óndirisine naqtyly eginshilik elementterin engizýge jáne jańǵyrtý úshin negiz jasaýǵa múmkindik beredi.
«Bıyl oblys dıqandary 5,4 mıllıon gektar jerge tuqym sebýdi josparlap otyr, onyń 400 myń gektary maıly daqyldary, 340 myń gektary mal azyǵy, 4,7 myń gektary kartop jáne 350 gektary kókónis. Jumys kestesine sáıkes oblysta 20 jumys kúni ishinde dándi daqyldardy egý josparlanǵan. Bıyl tuqym sebý naýqanyna 15 myńnan astam traktor, 16 myńnan astam astyq sepkish jáne 1,5 ónimdiligi joǵary egis kesheni jumyldyrylady. Qazirgi kezde óńirde kóktemgi dala jumystaryn júrgizý úshin qajetti aýyl sharýashylyǵy tehnıkalarynyń 83 paıyzy daıyn», - deıdi Erkesh Álenov.
Aıtýynsha, óńirde kóktemgi egiske qajetti 536,8 myń tonna tuqym qajet bolsa, qazir onyń 436,6 myń tonnasy nemese qajetti tuqymnyń 81 paıyzy qolda bar. Qalǵany 19 paıyzy azyq-túlik korporatsııasy jáne elıtalyq tuqym sharýashylyqtary arqyly satyp alynbaqshy. Buǵan qosa, sharýashylyqtardy janar-jaǵar maımen qamtamasyz etý máselesi de jiti nazarda.
«Oblysqa kóktemgi egis úshin 82,5 myń tonna janar-jaǵar maı bólindi, onyń 1 lıtri 250 teńge turady, ıaǵnı byltyrǵy jylǵy shamadaı. Qazirgi kezde, 17 jetkizip berýshi operator anyqtalyp otyr. Jalpy, bıyl qardyń jyldaǵydan kóp túsýin aqmolalyq sharýalar jaqsy yrymǵa balap otyr. «Kóktemniń bir kúni jylǵa azyq» degen qaǵıdany esterine myqtap ustap, kóktemgi dala jumystaryna tyńǵylyqty ázirlikpen kelýdi maqsat tutýda», - dep tolyqtyrdy Erkesh Álenov.
Aıta ketsek, ótken jyldyń kúzinde aqmolalyq dıqandar 3 mıllıon tonadan astam astyq jınaǵan bolatyn.