Bıyl aqyly joldardan 26,5 mlrd teńge jınaldy – Jol aqysy qaıta qaralyp jatyr

<p>Qazaqstannyń 3200 shaqyrym jolynda aqyly júıe jumys isteıdi. Otandyq tasymaldaýshylar úshin aı saıynǵy jáne jyldyq abonenttik tólem kózdelgen. Bul týraly QR Kólik mınıstri Marat Qarabaev aıtyp berdi, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Mınıstr jyl saıyn elimizdegi joldardy kútip ustaýǵa 60 mlrd teńge kóleminde qarjy qajet bolatynyn aıtty.

«Osy oraıda respýblıkalyq bıýdjetke salmaqty azaıtý maqsatynda aqyly joldar kólemin kezeń-kezeńimen engizýdemiz. Qazirgi tańda 3 200 shaqyrymda aqyly júıe engizilgen. 11 aıdyń qorytyndysy boıynsha 26 mlrd 500 mln teńge qarajat tústi», - dedi Marat Qarabaev Úkimettiń búgingi otyrysynda.

Onyń aıtýynsha, kelesi jyly qosymsha 1 200 shaqyrymǵa aqyly júıe engizýdi josparlanyp otyr.

«Jalpy 2029 jylǵa deıin rekonstrýktsııalaý jumystarynyń aıaqtalýyna qaraı, mundaı joldar kólemi 11 myń shaqyrymǵa jetkiziledi. Bul rette Qazaqstandaǵy aqyly jol tarıfteri jaqyn jáne alys shet eldermen salystyrǵanda eń tómen ekenin aıta ketken jón», - deıdi Marat Qarabaev.

Sońǵy ýaqytta tranzıttik aǵynnyń ósýine baılanysty, jóndelgen joldardy normatıvtik jaǵdaıda saqtaý úshin jol aqysyn qaıta qaraý jumystary júrgizilip jatyr.

«Aqyly júıe birinshi kezekte tranzıttik kólik quraldarynan qarajat jınaýǵa baǵyttalǵanyn eskerip, otandyq tasymaldaýshylar úshin aı saıynǵy jáne jyldyq abonenttik tólem kózdelgen», - dedi M.Qarabaev.

Aıta keteıik, bıyl halyqtyń shaǵymyn eskere otyryp, barlyq kúsh qurylysy uzaqqa sozylǵan 6 negizgi jobaǵa baǵyttaldy. Bul – Taldyqorǵan-Óskemen, Qaraǵandy-Almaty, Merke-Býrylbaıtal, Aqtóbe-Qandyaǵash jáne Atyraý-Astrahan joldary.