Bıyl 8 aıda elimizde joldaǵy apattan ólim-jitim 3 paıyzǵa tómendedi

<p>Osy jyly jol-kólik apaty saldarynan ólim-jitim azaıdy. Bul týraly Qazaqstannyń ornyqty damý salasyndaǵy ulttyq maqsattar men mindetterdi iske asyrý monıtorıngi jónindegi Parlamenttik komıssııa otyrysynda Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.</p>

«Elimizde jol-kólik oqıǵalary saldarynan qaıtys bolǵandar men jaralanǵandar sanyn azaıtý baǵytynda tıisti jumystar atqarylyp jatyr. Bul rette, 2022 jyldyń qorytyndysy boıynsha jol-kólik oqıǵalary saldarynan ólim-jitim 15 paıyzǵa artqan edi. Bıylǵy 8 aıdyń qorytyndysy boıynsha, bul kórsetkish byltyrǵy sáıkes kezeńmen salystyrǵanda 3 paıyzǵa tómendedi», - dedi A. Ǵınııat.

Onyń aıtýynsha, jol-kólik oqıǵalarynan keıin saldaryn azaıtý úshin medıtsına salasynda tıisti qadamdar eskerilgen. Bul turǵyda respýblıkalyq jáne oblystyq mańyzy bar joldarǵa jaqyn ornalasqan aýdanaralyq ortalyq aýrýhanalar quramynda 28 travmatologııalyq bólimshe qyzmet etip jatyr.

«Munymen qosa, Tótenshe jaǵdaılar mınıstrligi qurylymynda respýblıkalyq mańyzy bar joldardyń avarııalyq-qaýipti ýchaskelerinde 40 medıtsınalyq-qutqarý pýnkti jumys istep tur. Jalpy, jaralanǵan adamdarǵa medıtsınalyq kómek kórsetýdi jetildirý jónindegi 2022-2023 jyldarǵa arnalǵan jol kartasy iske asyrylyp jatyr. Bul rette, jol-kólik oqıǵalary saldaryn odan ári tómendetý maqsatynda múddeli ortalyq memlekettik jáne jergilikti atqarýshy organdardyń vedomstvoaralyq jumysy qajet», - dedi mınıstr.

Budan buryn habarlanǵandaı, A. Ǵınııat Qazaqstanda adamdardyń ómir súrý uzaqtyǵy 74 jastan asqanyn aıtty.