Bıyl 55 naýqas balanyń shetelde emdelýine joldama berildi

<p>ASTANA. KAZINFORM &ndash; Elimizde jyl saıyn 500-600 balada aýrý anyqtalady, olar jedel leıkozben, ortalyq júıke júıesiniń isikterimen, jumsaq tinderdiń sarkomalary jáne basqa da aýrýlarmen aýyrady. Bul týraly QR DSM Ana men bala densaýlyǵyn qorǵaý departamentiniń dırektory Maǵrıpa Embergenova aıtyp berdi.</p>

«Joǵary tehnologııalyq medıtsınalyq kómek kórsetý, dıagnozdy naqtylaý jáne ári qaraı emdeý taktıkasyn anyqtaý úshin balalar respýblıkalyq deńgeıdegi ortalyqtarǵa jatqyzylady. Eger elde jańa tehnologııalar qoldanylmasa, balalar shetelge emdelýge jiberiledi. 2024 jyly 55 balanyń shetelde emdelýine joldama maquldandy. Aıta ketý kerek, balalar shetelge tek Qazaqstanda tıisti tehnologııalar bolmaǵan jaǵdaıda ǵana jiberiledi», - dedi M. Embergenova Ortalyq kommýnıkatsııalar qyzmetinde.

Qazaqstan – Ortalyq Azııada jańa týǵan sábıge kardıohırýrgııalyq operatsııalar júrgiziletin jalǵyz memleket. Jyl basynan beri 9 aıda týa bitken júrek aqaýy bar balalarǵa ashyq júrekke 1708 ota jasaldy, onyń 48%-y bir jasqa deıingi balalarǵa jasaldy.

«Jaǵdaıy asa aýyr balalardyń ómirin saqtaý úshin Qazaqstanda telemedıtsınalyq tehnologııalar men medıtsınalyq avıatsııa qoldanylady. Jyl basynan beri sanavıatsııa shamamen 460 ret ushty, onyń ishinde, 292 jaǵdaıda jańa týǵan nárestelerge bardy. 498 bala tasymaldandy, onyń ishinde 291 bala Astana jáne Almaty qalalaryna jetkizildi», - dedi spıker OKQ alańynda ótken dóńgelek ústel barysynda.

Jyl saıyn orta eseppen 500-600 balada aýrý anyqtalady, olardyń 41%-y jedel leıkozben, 14%-y ortalyq júıke júıesiniń isikterimen, 9%-y jumsaq tinderdiń sarkomalary jáne basqa da aýrýlarmen aýyrady.

Balalardyń 38%-ynda onkologııanyń 1-2 satysy anyqtalady. Jas qurylymy boıynsha naýqas balalardyń 33%-y 3-10 jas aralyǵynda.

Buǵan deıin M. Embergenova Qazaqstanda shala týǵan sábılerge qandaı kútim kórsetiletinin aıtqan edi.