Bıyl 4 aýqymdy joba qolǵa alynady — Memleket basshysy

<p>ALMATY. KAZINFORM — Prezıdent Almatydaǵy Naýryz merekesine arnalǵan saltanatty jıynda bıyl elimizde 4 aýqymdy joba qolǵa alynatynyn jetkizdi.</p>

Atap aıtqanda, kóptegen jylý ortalyǵy jáne ınjenerlik jeliler jańǵyrtylady, 12 myń shaqyrym jol salynyp, jóndeledi.

Sonymen qatar 300 myń adam tabıǵı gazdyń ıgiligin kóre bastaıdy jáne aýyl men aýdan turǵyndary úshin jańa turǵyn úı baǵdarlamasy iske qosylady.

Memleket basshysynyń aıtýynsha, áleýmettik jaǵynan osal toptaǵy azamattar úshin nesıe ósimi 7 paıyzdan aspaıtyn bolady.

Al jalǵa beriletin baspana sany birneshe ese kóbeıedi.

— Munyń bári halyqtyń turmys sapasyn jaqsartýǵa yqpal eteri sózsiz. Elge, halyqqa arnalǵan osyndaı ıgi sharalar mindetti túrde jalǵasyn tabady. Barshańyzdy búgingi Kóktem merekesimen taǵy da shyn júrekten quttyqtaımyn! Ulys oń bolsyn! Aq mol bolsyn! Elimiz aman, jurtymyz tynysh bolsyn! — dedi Memleket basshysy.

Qasym-Jomart Toqaev quttyqtaý sózinen keıin alańǵa jınalǵan jurtshylyqpen birge merekelik kontsertti tamashalady.